Суди Олии Ҷумҳурии Тоҷикистон дар нимсолаи аввали соли 2022 нисбати чор нафар судя барои содир намудани ҷиноят парвандаи ҷиноятӣ боз кардааст. Дар ин маврид раиси ин ниҳод Шермуҳаммади Шоҳиён зимни нишасти матбуотӣ бо рӯзноманигорон иттилоъ дод.

Ӯ гуфт, ин ҳолат роҳбарияти Суди Олиро ба ташвиш овардааст, вале содир кардани ҷиноят аз ҷониби судяҳо раванди зиёдшавӣ надошта, андешаи он ки теъдоди зиёди судяҳо ба ҷиноят даст мезананд, асос надорад.

- Дар нимсолаи аввали соли ҷорӣ чор нафар судя ҷиноят содир кардаанд. Онҳо раиси суди шаҳри Хуҷанд бо судяаш, судяи суди ноҳияи Бобоҷон Ғафуров ва судяи суди ноҳияи Сино мебошанд,-илова кард Ш. Шоҳиён.

Ҳамзамон ӯ гуфт, ки барои пешгирии чунин кирдорҳо супориши ҷиддии хаттӣ аз ҷониби раиси Суди Олӣ ба судҳои вилоятӣ ва шаҳриву ноҳиявӣ оид ба ин масъала ирсол гардида, мавриди татбиқ қарор дорад.