Ҳамасола 10 август дар Ҷумҳурии Тоҷикистон Рӯзи варзишгарон таҷлил мегардад. Тайи 35 соли Истиқлоли давлатӣ соҳаи варзиш бо дастгирии пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба яке аз самтҳои афзалиятноки сиёсати иҷтимоии давлат табдил ёфтааст. Бунёди садҳо иншооти варзишӣ дар шаҳру ноҳияҳои кишвар, фароҳам овардани шароити мусоид барои тамрини варзишгарон, дастгирии молиявию маънавӣ ва ҳавасмандгардонии ғолибони мусобиқаҳои бонуфузи байналмилалӣ ва ба Тоҷикистон ҷалб намудани мусобиқаҳои сатҳи ҷаҳонӣ аз ҷумлаи тадбирҳое мебошанд, ки барои рушди варзиши кишвар заминаи устувор гузоштаанд. Имрӯз самараи чунин сиёсати варзишпарварона дар дастовардҳои назарраси варзишгарони тоҷик дар арсаи байналмилалӣ равшан эҳсос мешавад. Ба муносибати Рӯзи варзишгарон мо андешаи чанде аз чеҳраҳои муваффақи варзиши кишварро дар бораи дастгириҳои давлат ва нақши онҳо дар пешрафти варзиши тоҷик пурсон шудем.

Эмомалӣ Нуралӣ (ҷудо):

- Президенти Ҷумҳурии Тоҷикистон муҳтарам Эмомалӣ Раҳмон барои рушди варзиш ва дастгирии варзишгарон корҳои зиёдеро анҷом додаанд. Аз ҷумла, дар шаҳру ноҳияҳои кишвар даҳҳо иншооти варзишӣ бунёд гардид, ки имрӯз варзишгарон дар онҳо дар шароити хуб тамрин карда, маҳорати худро такмил медиҳанд. Яке аз рӯйдодҳои муҳими имсола ба Тоҷикистон овардани мусобиқаи байналмилалии World Judo Masters мебошад, ки моҳи декабри соли ҷорӣ дар шаҳри Душанбе баргузор хоҳад шуд. Ин иқдом барои рушди ҷудои тоҷик ва баланд бардоштани маҳорати варзишгарон дастгирии хеле муҳим аст.

Ҳамчунин, ман шахсан аз дастгириҳое, ки нисбат ба варзишгарон зоҳир мегардад, миннатдорам. Баъди ба даст овардани натиҷаи назаррас аз ҷониби раиси шаҳри Душанбе муҳтарам Рустами Эмомалӣ соҳиби хонаи дуҳуҷрагӣ гардидам. Илова бар ин, бо ташаббуси роҳбарияти Федератсияи ҷудои Тоҷикистон имсол ду мураббии ботаҷриба аз Гурҷистон ба кишвар даъват шуданд, ки таҷрибаи онҳо барои мо бисёр муфид аст. Барои ҳамаи ин дастгириҳо ба Президенти Ҷумҳурии Тоҷикистон, раиси шаҳри Душанбе ва президенти Федератсияи ҷудои Тоҷикистон изҳори сипос менамоям.

Муҳидин Асадуллоев (ҷудо):

- Дар давоми 35 соли соҳибистиқлолӣ Ҳукумати Ҷумҳурии Тоҷикистон, махсусан Пешвои муаззами миллат ба рушди соҳаи варзиш таваҷҷуҳи махсус зоҳир намудааст. Бо дастгирии давлат дар шаҳру ноҳияҳои кишвар толорҳо ва майдончаҳои муосири варзишӣ бунёд гардида, барои тамрини варзишгарон шароити мусоид фароҳам оварда шудааст. Маҳз ҳамин таваҷҷуҳ ва дастгирӣ боис гардидааст, ки варзиши Тоҷикистон сол аз сол рушд намуда, варзишгарони тоҷик дар мусобиқаҳои байналмилалӣ ба натиҷаҳои арзанда ноил гардида, ҷойҳои ифтихориро соҳиб мешаванд.

Миҷгона Самадова (бокс):

- Пеш аз ҳама, миннатдории худро ба Пешвои миллат ва инчунин ба раиси шаҳри Душанбе мерасонам, ки ҳамеша варзишгаронро дастгирӣ мекунанд. Ҳар боре ки мо бо натиҷаҳои хуб аз мусобиқаҳо бармегардем, ҳатман қадрдонӣ мешавем.

Пас аз Бозиҳои Осиёии Ҳанҷоу соли 2023, ки соҳиби медали биринҷӣ гардидам, аз ҷониби раиси шаҳри Душанбе ба ман дар маркази шаҳр хонаи истиқоматӣ туҳфа гардид. Ин барои ҳар як варзишгар ангезаи бузург аст. Вақте давлат моро дастгирӣ мекунад, тамоми шароитро барои тамрин, ҷамъомадҳои таълимӣ ва иштирок дар мусобиқаҳо фароҳам меорад, мо низ кӯшиш мекунем бо заҳмати бештар натиҷаҳои баланд ба даст оварда, Парчами Тоҷикистонро дар арсаи байналмилалӣ баланд бардорем.

Аминҷон Абдуҷалилов (ҷудо):

- Дар давоми 35 соли соҳибистиқлолӣ дастгирии Ҳукумати Ҷумҳурии Тоҷикистон нисбат ба соҳаи варзиш хеле назаррас аст. Сол аз сол варзиш дар кишвар рушд мекунад ва ин пешрафт натиҷаи таваҷҷуҳи доимии Пешвои миллат ба соҳа мебошад. Имрӯз барои варзишгарон тамоми шароити зарурӣ муҳайё карда шудааст, то онҳо бе ягон мушкил ба мусобиқаҳо омодагӣ бинанд. Мо низ вазифадорем бо меҳнати содиқона Тоҷикистонро дар арсаи байналмилалӣ шоиста муаррифӣ намоем. Умед дорем, ки дар солҳои оянда варзишгарони тоҷик ба дастовардҳои боз ҳам бузургтар ноил гардида, обруи кишвари азизамонро баланд мебардоранд.

Лоиқ Қудбиддинов (ҷудо):

- Ба назари ман, дар давоми 35 соли Истиқлоли давлатӣ Ҳукумати кишвар барои рушду пешрафти соҳаи варзиш корҳои назаррасро анҷом додааст. Дар тамоми шаҳру ноҳияҳои ҷумҳурӣ варзишгоҳҳо, толорҳои замонавӣ ва майдончаҳои варзишӣ бунёд гардида, барои омодагии варзишгарон тамоми шароити зарурӣ муҳайё шудааст. Бо дастгирии пайвастаи давлат варзишгарони тоҷик дар мусобиқаҳои сатҳи минтақавӣ, қоравӣ ва ҷаҳонӣ ба натиҷаҳои арзанда ноил гардида, Парчами Тоҷикистонро борҳо дар арсаи байналмилалӣ парафшон кардаанд. Ин ҳама самараи таваҷҷуҳи давлат ба рушди варзиш мебошад.

Таҳияи Шаҳноза АЗИМОВА, “ҶТ”