Дар меҳмонхонаи “Ҳайят реҷенсӣ” нишасти матбуотӣ бо иштироки намояндагони мақомоти давлатӣ, ҷомеаи шаҳрвандӣ ва васоити ахбори омма оид ба оғози лоиҳаи “Маъракаи иттилоотӣ оид ба истифодаи тасмаи бехатарӣ ва идоракунии экологии нақлиёт дар ш.Душанбе” баргузор гардид.

Дар чорабинии мазкур намояндагон аз Раёсати Бозрасии давлатии автомибилии ВКД, Мақомоти иҷроияи ҳокимияти давлатии шаҳри Душанбе, Вазорати нақлиёти ҷумҳурӣ ва Бонки аврупоии таҷдид ва рушд (БАТР) иштирок ва суханронӣ намуданд.

Зимни нишаст гуфта шуд, ки дар ҳолати ба вуҷуд омадани ҳодисаи нақлиётӣ агар тасмаи бехатарӣ истифода бурда нашуда бошад, эҳтимолияти ба ҳалокат расидан, ду маротиба афзоиш меёбад. Мусофирони нишастгоҳи қафо бошанд, ҳангоми бархӯрӣ оқибати садамаро боз вазнинтар менамоянд. Новобаста ба ин, дар Тоҷикистон ҳамагӣ 5% ронандагон тасмаи бехатариро истифода мебаранду халос. Истифодаи тасмаи бехатарӣ хавфи фавтро то 50% ба ронанда ва мусофири курсии пеш ва то 70% барои мусофирони курсиҳои қафо кам менамояд.

Дар рафти чорабинӣ оид ба вайрон гардидани қоидаҳои ҳаракат дар роҳ андешарониҳо сурат гирифта, таъкид гардид, ки бояд дар бартараф намудани мушкилоти мазкур тамоми шаҳрвандон фаъол бошанд.

Лоиҳаи мазкур тӯли як сол (аз апрели с.2017 то марти с.2018) идома ёфта, баҳрагирандагони он ронандагони ҷавон ва мусофирони то 30 сола мебошанд.

Беҳрӯз ХОЛМУРОДОВ, “ҶТ”