Президенти Академияи миллии илмҳои Тоҷикистон Фарҳод Раҳимӣ зимни нишасти матбуотии ин ниҳод қайд намуд, ки замин дар Тоҷикистон дар як сол тақрибан аз 20 то 30 маротиба меларзад.

Ӯ гуфт, соли 2020 дар кишвар заминларзае ба қайд гирифта шуд, ки аз рўи ҷадвали “Рихтер” аз 5 бал зиёд буд. Бори охир заминларзаи 5 бала 26-уми декабри соли 2015 дар Тоҷикистон ба қайд гирифта шуда буд.
- Мо дар минтақаи аз ҷиҳати сейсмикӣ фаъол қарор дорем, махсусан минтақаи Ҳиндукуш, Ҳимолой ва Помир. Асосан заминларза дар минтақаи Ҳиндукушу Ҳимолой ба вуҷуд меоянд ва таъсири он ба мо мерасад. Агар омори 100 соли охирро дида бароем, тақрибан ҳамасола баробар буда, ягон хати авҷгирии заминларза ба мушоҳида намерасад, - гуфт номбурда.

Ӯ дар идома қайд намуд, ки Академияи миллии илмҳои Тоҷикистон бо истифода аз имкониятҳои дохилӣ аз 28 феврали соли ҷорӣ ба истеҳсоли маводи гипохлорити натрий, ки ҳамчун маводи маъмули антисептикӣ барои безараргардонии вирусҳо васеъ истифода бурда мешавад, шурўъ намуд ва илова бар ин бо усули электролиз истеҳсоли оби нуқраро ба роҳ мондааст.

Садбарг СУЯРОВА, “ҶТ”