ҶОМЕА
Душанбе 30 Январ 2023 12:43
9109
Бо ибтикори мақомоти иҷроияи ҳокимияти давлатии Вилояти Мухтори Кӯҳистони Бадахшон ва дар ҳамкорӣ бо Шурои Ҳаракати ваҳдати миллӣ ва эҳёи Тоҷикистону Академияи миллии илмҳои Ҷумҳурии Тоҷикистон дар шаҳри Хоруғ конференсияи илмӣ-назариявии ҷумҳуриявӣ зери унвони “Нақши Иҷлосияи 16-уми Шурои Олии Ҷумҳурии Тоҷикистон дар таъмини якпорчагии миллати тоҷик” доир гашт.

Чорабиниро раиси ВМКБ Мирзонабот Алишер Худобердӣ оғоз бахшида, нахуст аҳли илму адаб, меҳмонон ва дигар иштирокчиёни конференсияро ба муносибати сисолагии Иҷлосияи тақдирсози Шурои Олии Ҷумҳурии Тоҷикистон табрику шодбош намуд.

Номбурда аз ҷумла зикр кард, ки дар поёни асри 20 таърих бо сабабу омилҳои гуногун боз миллатро бо имтиҳони ҷиддӣ рӯ ба рӯ намуд. Танҳо ақли фитрӣ, ҷасорати фарзандони миллатдӯсту ватанпараст таҳти роҳбарии Пешвои муаззами миллат муҳтарам Эмомалӣ Раҳмон дар ин маврид на танҳо давлатдории моро аз нестӣ ва миллатро аз парокандагӣ наҷот бахшид, балки ба марҳилаи нави таърихии инкишофи миллат асос гузошт.

“Иҷлосияи тақдирсоз воқеаи муҳим дар таърихи миллат буда, гардиши куллиро дар масири ҳаракати миллат ба вуҷуд овард. Дар радифи барқарор намудани сохти конститутсионӣ ва ҳалли масъалаҳои дигар, дар он қарорҳои стратегие қабул шуданд, ки ояндаи миллат, самту ҳадафи мавҷудият ва ҷойгоҳи онро дар арсаи ҷаҳонӣ муайян намуданд. Нуқтае, ки диққати махсусро талаб мекунад, ин дар радифи таҳқиқу омӯзиши таърихи миллат, ба таври зарурӣ ба роҳ мондани таълим ва тарғибу ташвиқи таърихи нави миллат ва давлатдории он мебошад. Аз ҷумла, таърихи даъват, ташкил, баргузорӣ ва аҳамияти Иҷлосияи таърихию сарнавиштсоз бояд амиқан мавриди омӯзиш ва тарғибу ташвиқ қарор дода шавад”, - афзуд, раиси ВМКБ.

Таъкид гардид, ки хосса насли наврасу ҷавони ҷомеаро мебояд, ки таърихи иҷлосияро хеле хуб аз худ намуда, ҷиҳати тақвияту таҳкими ҳисси ватанпарастӣ, баланд бардоштани ҳувияти миллӣ ва сабақ гирифтан аз чунин дастовардҳо воқеъбин бошанд.

“Аҳамияти Иҷлосия дар радифи Истиқлолият ва ваҳдати комили миллӣ меистад, зеро маҳз тавассути қарорҳои он Истиқлолият ва ваҳдати миллӣ таҳким ёфтанд. Таҷрибаи давлатсозии навини тоҷикон, ки аз Иҷлосияи 16-уми Шурои Олӣ сарчашма мегирад, ба андешаи мо, дар замони имрӯза барои давлатҳои зиёди дар гирудори пурпечутоби сиёсию иҷтимоӣ мувоҷеҳбуда ва умуман, барои кулли ҷомеаи байналмилалӣ аз манфиат холӣ нахоҳад буд” – гуфт, Алишер Мирзонабот, раиси ВМКБ.
  
Дар идомаи чорабинӣ Абдунабӣ Сатторзода, мудири шуъбаи таърихи адабиёти Институти забон ва адабиёти ба номи А. Рӯдакии Академияи миллии илмҳои Тоҷикистон, доктори илмҳои филологӣ, профессор дар мавзӯи “Эмомалӣ Раҳмон-бунёдгузори сиёсати хориҷии навини Ҷумҳурии Тоҷикистон” маърӯза намуда қайд кард, ки Пешвои муаззами миллат муҳтарам Эмомалӣ Раҳмон дар мавриди сиёсати хориҷии Тоҷикистон, асосан аз сиёсати сулҳхоҳона ва беғараз кор гирифта, тавонистанд сиёсати дарҳои бозро эълон намоянд.

- Дар мавриди сиёсати сулҳҷуёнаи роҳбари ҷавони давлати навтаъсис, ки аз рӯзҳои аввали ба сари ҳокимият омаданаш мавриди дасгирии на танҳо мардуми шарифи Тоҷикистон, балки ҷомеаи ҷаҳонӣ низ қарор гирифта, ҳамчун заминаи хуб барои ба роҳ мондани сиёсати хориҷию ба ҷаҳониён муаррифӣ кардани давлати Тоҷикистон боис шуд, ки обруву нуфузи Тоҷикистон давоми зиёда аз 30 сол таҳкиму тақвият ёбад, - тазаккур дод, Абдунабӣ Сатторзода.

Дар идома муовини директор оид ба илм ва таълими Институти иқтисод ва демографияи АМИТ, доктори илмҳои иқтисод, профессор Аброр Мирсаидов дар мавзӯи “Нақши шахсият дар пойдории ҷомеаи муташаккили ратсионалӣ” ва дигар олимону аҳли илму фарҳанг маърӯзаҳои ҷолиби илмиро дар доираи конференсия пешкаши ҳозирин карда, табодули афкор сурат гирифт.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Январ 2023 c.