МУАЛЛИФ: ХУРШЕД МАВЛОНОВ

Агентии хоҷагии ҷангали назди Ҳукумати ҷумҳурӣ дар давоми соли 2016 аз ҳудудҳои табиии махсус муҳофизатшаванда доир ба вайрон кардани талаботи Кодекси ҷангал ба миқдори 2051 санади ҳуқуқвайронкунӣ тартиб додааст, ки маблағи умумии 385,4 ҳазор сомониро ташкил медиҳад.

Раҷабалӣ Шарифов, муовини аввали директори Агентии хоҷагии ҷангал гуфт, ки аз миқдори умумии қонунвайронкуниҳои ошкоргардида 1401 адад буриши дарахтон, 241 адад ҷамъоварии худсаронаи меваҳои хурданибоби ҷангал ва 177 адад шикори беиҷозат мебошад.

- Соли 2016 ба миқдори 1035 протоколи ҳуқуқвайронкунии маъмурӣ ба маблағи 205,1 ҳазор сомонӣ тартиб дода шуд ва аз 185,4 ҳазор сомониаш барқарор ва ба буҷети ҷумҳурӣ пардохт карда шуд, - гуфт Раҷабалӣ Шарифов.

Гуфта шуд, ки шумораи буриши дарахтон ва шикори ҳайвонот вақтҳои охир афзуда истодааст. Р. Шарифов сабаби аслии онро дар ҳамкорӣ накардани мурдум ва маоши пасти кормандони агентӣ арзёбӣ намуд.

- Дар агентӣ 2846 нафар корманд ба таври доимӣ ва 7000 нафар тариқи шартнома кор мекунанд. Маоши миёнаи кормандони шартномавӣ 475 сомониро ташкил медиҳад, ки барои пешбурди корҳои муҳофизатӣ хеле кам аст, - гуфт ӯ.