Ғамхорӣ дар ҳаққи ятимон ва дароз кардани дасти хайру сахо ба онҳо вазифаи ҳар як фарди бонангу номус ва шахсони саховатпеша мебошад. Эмомалӣ РАҲМОН

Дастгирии ятимону бепарасторон, маъюбону ниёзмандон, оростани дастархони идонаву супоридани туҳфаҳои гуногун ба онҳо дар арафаи ҳар иду айём аз иқдомҳои ҳамешагии Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад. Устодону донишҷӯёни Академияи идоракунии давлатии назди Президенти Ҷумҳурии Тоҷикистон дар доираи Нақша – чорабиниҳо ба бахшида Рӯзи Парчами давлатӣ бо ташаббуси кафедраи “Идоракунии захираҳои инсонӣ” ҷиҳати дар амал татбиқ намудани дастуру ҳидоятҳои Пешвои муаззами миллат муҳтарам Эмомалӣ Раҳмон оид ба дастгирии ятимону бепарасторон барои аёдат ба Хонаи бачагони № 2 - и шаҳри Душанбе рафтанд.

Ҳайдарӣ Сабоҳат, мудири кафедраи “Идоракунии захираҳои инсонӣ”, Фарҳод Раҳимов, муовини декани факултети идоракунии давлатӣ, Раҳматулло Каримов, сармуҳаррири рӯзномаи “Сарвар ва миллат” ва донишҷӯёни курси чоруми ихтисоси идоракунии ҳайати кадрии факултети идоракунии давлатӣ бо шароити хонаи кӯдакон шинос шуда, бошандагони онро бо Рӯзи Парчам муборакбод гуфта ва ба ҳар як тарбиятгирандаи ин даргоҳ шириниҳо, тақдим намуданд, инчунин барои онҳо дастархони идона ороста шуд.

Ҳамчунин, бо иштироки гурӯҳи ҳаҷвнигорони ҷавони “Лабханди ҷавонӣ”-и назди Кумитаи кор бо ҷавонон ва варзиш чорабинии фарҳангӣ- фароғати низ доир гардид, ки шодии кӯдакон ҳадду канор надошт.

Ҳайдарӣ Сабоҳат, омӯзгорон, мурабияҳо ва кӯдаконро аз номи Раёсати Академияи идоракунии давлатии назди Президенти Ҷумҳурии Тоҷикистон бахшида ба Рӯзи Парчами давлатӣ табрику таҳният гуфта, иброз дошт, ки агар имрӯз насли наврас дар рӯҳияи ватандӯстию хештаншиносӣ, накӯкорию созандагӣ ва бунёдкорӣ тарбия ёбад, ояндаи ҷомеа пурифтихор хоҳад буд.

Хонаи бачагони № 2 - и шаҳри Душанбе яке аз муассисаҳое ба шумор меравад, ки дар таълиму тарбияи насли наврас нақши муҳим дорад. Дастпарварони он пайваста аз ғамхориҳои давлат ва Ҳукумати ҷумҳурӣ бархӯрдоранд. Тарбиятгирандагони ин даргоҳ бо хобгоҳҳои алоҳидаи духтаронаву писарона таъмин буда, ҳуҷраву толорҳои хобгоҳҳо ободу зебо ва бо ашёву лавозимоти зарурӣ муҷаҳҳаз ва аз хидматрасонии тиббӣ бархӯрдоранд. Омӯзгорону мураббиҳои ғамхор пайваста аз дарди дили ҳар як нафар огаҳӣ пайдо карда, мекӯшанд то мушкиле дар зиндагиашон роҳ наёбад ва онҳо худро танҳо ҳис накунанд. Дар ин муассиса, кӯдакони ятими кул ва нимятимон, инчунин фарзандон аз оилаҳои ниёзманд, афроди бепарастор, фарзандони волидайнашон гирифтори бемориҳои руҳӣ ба таълиму тарбия фаро гирифта шудаанд. Омӯзгорону мураббияҳои хонаи бачагони № 2 бо дарки ин ҳақиқат пайваста талош доранд, ки рисолати худро бо масъулияти баланд иҷро намуда, дар таълиму тарбияи кӯдакон ва шукуфоии ҷомеа саҳми босазо гузоранд.