МУАЛЛИФ: БЕҲРӮЗ ХОЛМУРОДОВ

Кумитаи забон ва истилоҳот лоиҳаи “Феҳристи номҳои миллии тоҷикӣ”-ро барои тасдиқ ба Ҳукумати ҷумҳурӣ пешниҳод намуд, ки аз ҷониби Ҳукумати мамлакат аз 27.07.16, №325 тасдиқ шуд. Дар заминаи он Фарҳанги номҳои миллии тоҷикӣ (номҳои писаронаю духтарона дар 2 ҷилд) таҳия шуд, ки дар арафаи нашр аст.

Гавҳар Шарофзода, раиси Кумитаи забон ва истилоҳоти назди Ҳукумати ҷумҳурӣ, зимни нишасти хабарӣ иброз дошт, ки ҳадаф аз таҳияи “Феҳристи номҳои миллии тоҷикӣ” эҳёи арзишҳои маънавӣ ва сарватҳои бебаҳои таъриху фарҳанги миллӣ тавассути забони миллӣ, инчунин номгузории суннатии тоҷикӣ мебошад.

Номбурда гуфт, феҳристи номҳои миллии тоҷикӣ аз ду қисмат иборат буда, бо рақамгузорӣ пайгирӣ мешавад. Дар қисмати аввал номҳои духтарона ва дар қисмати дуюм номҳои писарона оварда шудаанд ва бо мақсади навиштани дурусти номҳои миллӣ дар ҳуҷҷатгузорӣ тарзи навишти номҳои духтаронаю писарона бо се забон – тоҷикӣ, русӣ ва англисӣ оварда шудаанд.

Доир ба поймол гардидани меъёрҳои забони давлатӣ гуфта шуд, ки аз ҷониби мақомоти судӣ барои риоя нагардидани муқаррароти Қонун “Дар бораи забони давлатии Ҷумҳурии Тоҷикистон” бо моддаи 89 Кодекси ҳуқуқвайронкунии маъмурии Ҷумҳурии Тоҷикистон 59 парвандаи ҳуқуқвайронкунии маъмурӣ баррасӣ карда шуда, ба андозаи 45 660 сомонӣ таъин гардида, аз ин 37 060 сомонӣ ба фоидаи давлат рӯёнида шудааст.