27 – уми апрели соли равон ҷамъи блогерон ва ҷавонони фаъоли кишвар дар доираи форуми ҷавонон дар мавзӯи “Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдорию давлатсозӣ”, ки бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Иттифоқи ҷавонони Тоҷикистон роҳандозӣ гардидааст, аз ноҳияи Айнӣ дидан намуданд.

Дар даромадгоҳи ноҳияи мазкур меҳмононро фаъолону сокинони ин ноҳияи зебоманзари Тоҷикистон бо самимияту меҳмоннавозии тоҷикона истиқбол гирифтанд.

Сипас, меҳмонон аз оромгоҳ ва “Хона-музеи Нақибхони Туғрал” дидан карданд.

Ба гуфти масъулин, мақсад аз баргузории форум тарғиби мавзеъҳои таърихию сайёҳӣ, инчунин тарғиби имкониятҳои сайёҳӣ тавассути блогерон ба ҳисоб меравад.

Дар доираи форуми мазкур тибқи барнома иштирокчиёни он аз якчанд шаҳру ноҳияҳои дигари вилояти Суғд боздид хоҳанд кард, ки аз рафти он дар гузоришҳои дигар хабар медиҳем.