Зафарбек Давлатзода, директори Агентии беҳдошти замин ва обёрии назди Ҳукумати Ҷумҳурии Тоҷикистон 1-уми феврал зимни нишасти матбуотӣ аз гаронии нархи барқу ҳаққи хизмати обрасонӣ ба заминҳои корам изҳори нигаронӣ кард.

Ба таъкиди номбурда сабаби асосии пайдоиш ва болоравии қарзи идораҳои давлатии беҳдошти замин ва обёрии шаҳру ноҳияҳо дар назди ҶСК “Барқи тоҷик” паст будани тарифи ҳаққи хизмати обрасонӣ ва пайваста баланд гардидани тарифҳои неруи барқ мебошад.

Ӯ дар идома қайд намуд, ки дар асоси Қарори Ҳукумати Ҷумҳурии Тоҷикистон аз 29 ноябри соли 2023, №546 тарифҳои неруи барқ барои пойгоҳҳои обкашӣ, чоҳҳои амудӣ ва пойгоҳҳои таъмирию истеҳсолии Агентии беҳдошти замин ва обёрии назди Ҳукумати кишвар аз 1 апрел то 30 сентябр 10,67 дирам ва аз 1 октябр то 31 март 30,75 дирам муқаррар карда шудааст.

Дар ҳамин ҳол Зафарбек Давлатзода қайд намуд, ки ҷиҳати солимгардонии вазъи молиявию иқтисодии Агентӣ дар асоси фармоиши Хадамоти зиддиинҳисории назди Ҳукумати Ҷумҳурии Тоҷикистон тарифи ҳаққи хизмати обрасонӣ низ барои 1 м3 то 5 дирам (бо назардошти ААИ) баланд бардошта шуд.

Яҳё МАҲМАДНАБИЕВ, “ҶТ”