Дар Ҷумҳурии Тоҷикистон ба ҳолати 1 декабри соли 2022 музди миёнаи меҳнат беш аз 1 ҳазору 730 сомониро ташкил медиҳад.

Дар ин бора Гулнора Ҳасанзода, вазири меҳнат, муҳоҷират ва шуғли аҳолии Ҷумҳурии Тоҷикистон зимни нишасти матбуотӣ иттилоъ дод.

Ӯ афзуд, ки ин шумора нисбати соли 2021-ум 204,70 сомонӣ (13,4%) ва нисбат ба аввали соли 2022, 189,31 сомонӣ (12,9%) зиёд гардидааст.

Ҳамзамон қайд гардид, ки дар доираи роҳандозии тадбирҳои судманди Ҳукумати кишвар сатҳи камбизоатӣ сол аз сол коҳиш меёбад. Нишондоди мазкур тайи ду соли ахир ба андозаи 0,9% коҳиш ёфта, соли 2022 аз рӯи маълумоти пешакӣ ба 22,5% баробар шудааст.

Ба ҳолати 1 июни соли 2022 музди миёнаи меҳнат дар ВМКБ 1487,9 сомонӣ, вилояти Суғд 1548,4 сомонӣ, вилояти Хатлон 1218,6 сомонӣ, шаҳри Душанбе 2402,7 сомонӣ ва дар ШНТҶ 1338,1 сомониро ташкил медиҳад.

Мавриди зикр аст, ки соли 2021 музди миёнаи меҳнат дар кишвар 1525,4 сомониро ташкил медод.