Бо ташаббуси Кумитаи кор бо ҷавонон ва варзиши назди Ҳукумати ҷумҳурӣ, санаи 23 январ, таҳти унвони “Омӯзиши масъалаи ҷудошавии оилаҳои ҷавон ва роҳҳои пешгирии он дар Ҷумҳурии Тоҷикистон” ҳамоиш баргузор мегардад.

Тибқи иттилои Кумитаи кор бо ҷавонон ва варзиш ҳамоиши мазкур дар толори Маркази миллии патенту иттилооти Вазорати рушди иқтисод ва савдои кишвар доир шуда, дар он намояндагони вазорату идораҳо, ташкилоту муассисаҳо, Шӯрои уламо, мудирони шуъбаҳои кор бо занон ва оила, бахши кор бо ҷавонон ва варзиши шаҳри Душанбе ва ноҳияҳои тобеи ҷумҳурӣ вобаста ба вазъи пошхӯрии оилаҳои ҷавон маърӯза мекунанд.

Мақсад аз баргузории ҳамоиши мазкур пешгирии ҷудошавии оилаҳо ва пайдо намудани роҳҳои ҳалли ин масъалаи мубрам мебошад.