Дар селроҳаи даромадгоҳи мавзеи дурдастарини ноҳияи Деваштич - деҳаи Метк, ки дар паҳлӯи он мактабу чанд хонаҳои истиқоматӣ мавҷуд аст ва ҳангоми боришот сел ба сокинон хатар эҷод мекард, пули нав мавриди истифода қарор гирифт.

Пули мазкур бо иқдоми неки бонуи 80 солаи деҳа Маҳтобхон Фозилова ба истифода дода шуд.  Маҳтобхон 70 ҳазор сомонӣ маблағи пасандозашро, ки бо нияти зиёрати Хонаи Худо ыамъоварӣ намуда буд, барои сохтани пул ҳадя кард.

Дар тантанаи ба истифодасупории пули нав рохбари гурӯҳи кории Дастгоҳи иҷроияи Президенти Ҷумҳурии Тоҷикистон Абдуллозода Аҳдам Рустам, муовини раиси вилоят Хоҷазода Ориф Ашур, раиси нохия Рустам Ҷўразода ва раиси Кумитаи иҷроияи Ҳизби Халқии Демократии Тоҷикистон Исмоилиён Комрон аҳли деҳаро бо ин иқдоми хайрхоҳона, ки аз дастуру вазифагузориҳои Асосгузори сулҳу ваҳдати миллӣ - Пешвои миллат,муҳтарам Эмомалӣ Раҳмон бармеояд табрик гуфтанд.