Дар доираи сафари кории Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд, дар ноҳияи Ашт “Қасри паҳлавонони суғдӣ” ба истифода дода шуд.

Дар маросими ифтитоҳи иншооти нави варзишӣ ёрдамчии Президенти Ҷумҳурии Тоҷикистон оид ба масъалаҳои иқтисодӣ Ҳикматуллозода Неъматулло, муовини якуми раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Раҳимзода Шабнам ва раиси ноҳияи Ашт Шуҳрат Муҳаммадзода иштирок намуданд.

Зимни маросим таъкид гардид, ки бунёду ба истифода додани чунин иншооти варзишӣ барои рушди соҳаи варзиш, фароҳам овардани шароити мусоид барои машқу тамрини варзишгарон ва ҷалби наврасону ҷавонон ба тарзи ҳаёти солим аҳаммияти муҳим дорад.

Дар “Қасри паҳлавонони суғдӣ” барои машқу тамрини варзишгарон аз рӯйи гӯштини тарзи озод ва гӯштини миллии гӯштингирӣ шароити зарурӣ фароҳам оварда шудааст. Иншоот бо имкониятҳои зарурӣ барои гузаронидани машғулиятҳои мунтазам ва омодасозии варзишгарон ба мусобиқаҳои гуногуни сатҳи ҷумҳуриявию байналмилалӣ пешбинӣ гардидааст.

Ба истифода додани ин маҷмааи варзишӣ барои рушди намудҳои гӯштин дар ноҳияи Ашт, баланд бардоштани маҳорати варзишгарон, омодасозии паҳлавонони ҷавон ва дарёфти истеъдодҳои нави варзишӣ заминаи мусоид фароҳам меорад.

Яҳё МАҲМАДНАБИЕВ, “ҶТ”