8-уми август дар толори маҷлисгоҳи "Шарқи Озод" аз ҷониби Саридораи ҳифзи сирри давлатии назди Ҳукумати Ҷумҳурии Тоҷикистон дар ҳамкорӣ бо рӯзномаи "Ҷавонони Тоҷикистон" барои ҳайати эҷодии рӯзнома семинари омӯзишӣ дар мавзӯи “Масъалаҳои ҳифзи сирри давлатӣ дар матбуот ва дигар воситаҳои ахбори омма дар Ҷумҳурии Тоҷикистон” гузаронида шуд.

Семинари мазкур бо иштироки Паймона Қурбонова, мудири бахши бозрасии ҳифзи сирри давлатӣ дар матбуот ва дигар воситаҳои ахбори оммаи Саридораи ҳифзи сирри давлатӣ, Фарзона Абдунабизода, сармутахассиси раёсати ташкилоти коргузории назорат ва кадрҳои Саридораи мазкур, Шодихони Назар, сармуҳаррири рӯзномаи "Ҷавонони Тоҷикистон" ва кормандони ин рӯзнома ҷараён гирифт.

Ташкилкунандагон ҳадаф аз баргузории семинари мазкурро барои омӯзиши санадҳои меъёрию ҳуқуқии соҳаи ҳифзи сирри давлатӣ, бахусус дар самти пешгирии ифшои сирри давлатӣ дар матбуот ва дигар воситаҳои ахбори омма маънидод карда, дар ҷараёни он масъалаҳои муҳими соҳа вобаста ба фаъолияти воситаҳои ахбори омма дар Ҷумҳурии Тоҷикистон мавриди баррасӣ қарор дода шуд.

Дар раванди чорабинӣ мутахассисони соҳа ва иштирокчиён оид ба масъалаҳои болозикр табодули афкор намуданд.

Дар охир ба кормандони рӯзнома аз тарафи Саридораи ҳифзи сирри давлатӣ гувоҳномаҳо ҷиҳати иштироки фаъолона дар семинар супорида шуд.