Зери ҳамин унвон дар ҷамоати Маҳмадулло Абдуллоеви ноҳияи Ванҷ бахшида ба 28 - солагии Истиқлолияти Ҷумҳурии Тоҷикистон бо ширкати муовини раиси ноҳия Сафармамадзода Сафарбегим ва иҷрокунандаи вазифаи мудири Бахши кор бо ҷавонон ва варзиши ноҳия Муштарӣ Ёрова мизи мудаввар баргузор гардид.

Зимни суханронии хеш С. Сафарбегим таъкид кард, ки давоми соҳибистиқлолии кишвар ноҳияи Ванҷ дар баробари дигар шаҳру ноҳияҳои ҷумҳурӣ ба комёбиву дастовардҳои беназир ноил шуда, баҳри ҳифзу нигаҳдорӣ, қадр кардани ин неъматҳо ва ба наслҳои оянда расонидани онҳо рисолати ҳар яки мост.

- Ватанамон зодгоҳ, орзуву умед ва сарчашмаи хушбахтиву саодати тамоми Тоҷикистониён аст. Пешрафту ободии он ва гиромидошти арзишҳои миллӣ орзуи чандинасраи ниёгону аҷдодони мо буд. Хушбахтона дар замони соҳибистиқлолӣ бо сарварии Пешвои муаззами миллат муҳтарам Эмомалӣ Раҳмон ба ин ормонҳо расидем ва ҳифзи дастовардҳои истиқлолият ҷиддияти бештаре мехоҳанд,- зикр намуд муовини раиси ноҳия.

Инчунин дар чорабинӣ кормандони ҷавони идораю муассисаҳои маҳаллӣ, директорони мактабҳои таҳсилоти миёнаи умумӣ иштироку баромад карда, перомуни дастовардҳои ваҳдату соҳибистиқлолӣ, баланд бардоштани савияи дониши наврасону ҷавонон, ҳифзи манфиатҳои миллӣ ва дурӣ ҷустан аз зуҳуротҳои  номатлуби ҷомеа андешаҳои ҷолибро баён намуданд.