28 декабр муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Аҳмадзода Дилноза бо волонтёрони ташкилоти ҷамъиятии “Пайравони Пешвои миллат” ба дидорбинии кӯдакони ятиму бепарастори Мактаб-интернати рақами 1-шаҳри Душанбе рафтанд.

Ҳангоми аёдат муовини раиси кумита аз дастгирӣ ва кӯмакҳои пайвастаи Ҳукумати кишвар ва Сарвари давлат ёдовар шуда, иброз дошт, ки кӯдакони бепарастор таҳти ҳимоя ва парастории давлат қарор доранд. Аз ин рӯ онҳоро мебояд, ки ҳеҷ гоҳ озурдахотир набошанд ва пайваста барои хешро такмил додан талош варзанд. Чун Ҳукумати кишвар то қадри имкон шароитҳои созгорро барои эшон муҳайё хоҳад кард.

Пас аз баромаду суханрониҳо Дилноза Аҳмадзода ба кӯдакони ятиму бепарастор пӯшокаҳои гарму ширинӣ ва дигар туҳфаҳои хотирмон ҳадя кард.

Дар охир аз ҷониби волонтёрони ташкилоти болозикр бо иштироки фаъоли кӯдакон барномаи фарҳангӣ-фароғатӣ ташкил карда гардид.

Бояд гуфт, ки ин иқдом дар доираи силсила-аксияҳое, ки таҳти унвони "Хушҳолии ятимон, ин хушҳолии мост!" ҷараён доранд, баргузор гардида, аз ҷониби ниҳодҳои дигари кумита дар минтақаҳо то фарорасии соли нав идома хоҳад кард.