Дар нимсолаи якуми соли 2019 аз ҷониби мутахассиони озмоишгоҳҳои бехатарии озуқаворӣ дар бозорҳои истеъмолӣ 500 ҳазор ташхисҳо гузаронида шудааст,  ки аз он 129 373 адад ташхиси гӯшт ва маҳсулотҳои гуштӣ буда, боқимонда дигар намуди маҳсулотҳои хӯрока мебошад.

Раиси Кумитаи бехатарии озуқавории назди Ҳукумати Ҷумҳурии Тоҷикистон Камолзода Фарҳод Воҳид, 18 июл, зимни нишасти матбуотӣ вобаста ба натиҷаи ташхисҳои гузаронидашуда, чунин иттилоъ дод: “Дар натиҷаи ташхисҳо маҳсулотҳои ба талаботҳои байторию беҳдоштӣ ҷавобгӯ набуда, аз он ҷумла 18617 кг маҳсулоти гуштӣ, 5126 кг (литр) маҳсулоти ширӣ, 18 826 дона тухми ғизоӣ, 80 563 кг меваю сабзавот, 447,4 кг моҳӣ, 2482 кг маҳсулотҳои намакин, 828 литр равғани растанӣ ва 234 кг асал ҳамчун маҳсулоти бесифат ва хавфнок муайян карда шуда, аз фурӯш боздошту несту нобуд карда шудаанд”.

Гуфта шуд, аз ҷониби Маркази миллии ташхиси бехатарии озуқаворӣ, 22 адад марказҳо ташхиси бехатарии озуқаворӣ дар вилоятҳо ва шаҳру ноҳияҳо ва 65 адад озмоишгоҳҳо дар бозорҳои истеъмолӣ мунтазам фаъолият намуда, бо таҷҳизот ва реактивҳои зарурӣ таъмин шудаанд.

Акобир Шарифов, волонтёри “ҶТ”