Дар ноҳияи Мир Сайид Алии Ҳамадонӣ аз ҳисоби шахсони саховатпешаи Ҷамоати деҳоти Даштигуло 2,5 километр роҳи мошингард мумфарш мегардад.

Дар ин бора Маркази матбуоти вилояти Хатлон иттилоъ додааст.

Гуфта мешавад, ки ин кори хайр бо ибтикори Маркази дастгирии ташаббусҳои назди Ҷамоати деҳоти Даштигуло ва дастгирии Мақомоти иҷроияи ҳокимияти давлатии ноҳияи Мир Сайид Алии Ҳамадонӣ ба роҳ монда шудааст.

Тибқи рӯйхате, ки дастандаркорони ин ноҳия пешниҳод намудаанд, дар ин кори хайр зиёда аз 300 нафар сокинон саҳми худро гузоштаанд.

Дар ин маврид раиси ноҳияи мазкур Мирзозода Нурулло Абдулҳай аз дастгирии бевоситаи мақомоти иҷроияи ҳокимияти давлатии ноҳия дар ин кори хайр - мумфарш кардани 2,5 километр роҳи асосии мошингарди ҳудуди ҷамоат, ки аз байни деҳаи Файзобод (аз шоҳроҳи Душанбе - Фархор) то деҳаи Анҷиркони Ҷамоати деҳоти Панҷрӯд давом дорад, изҳори қаноатмандӣ намуд.

Ҳамзамон, дар сафарбар намудани техникаҳои Идораи роҳсозии ноҳия, дастрасии нисбатан арзони масолеҳи роҳсозӣ, ҳамоҳангӣ бо ашхоси эҳсонкор - намояндаи Ҳукумати Ҷумҳурии Тоҷикистон дар ноҳия, раиси Корхонаи давлатии "Роҳи оҳани Тоҷикистон" Комили Мирзоалӣ, Ҳоҷӣ Абдулазиз Ҷобиров дар ин амали хайр саҳми худро гузоштаанд.

Гуфта мешавад, ки бо мумфарш кардан ва бунёди корҳои зикршуда ҳолати рафтуомади аҳолӣ, алалхусус ашхоси маъюб, кӯдакон ба мактаб беҳтар гардида, бехатарии ҳаракат дар роҳ таъмин мешавад. Инчунин, натиҷаи ин амал ба ҳусни деҳа ҳусни дигар зам хоҳад кард.