МУАЛЛИФ: МАШҲУР ИМОМНАЗАРОВ

Ба истифода додани хати обгузари Боғевдара имкон дод, ки 90 фисади аҳолии шаҳри Хоруғ бо оби ошомиданӣ таъмин гарданд. Танҳо қисмати маҳаллаи Ниводак бе хати оби нӯшокӣ монд.

Дар ин бора сардори Корхонаи хоҷагии манзилию коммуналии ВМКБ Тоҳир Паҳлавонов иттилоъ дода гуфт, ки ҷиҳати худсарона пайваст кардани 60 адад қубури обгузар ба чашмаи Хуфак бархе аз маҳаллаҳои маркази вилоят бо оби нӯшокӣ таъмин нашуданд.

Мавсуф изҳори нигаронӣ кард, ки баъзе сокинони шаҳр муддатҳои дароз аз пардохти ҳаққи истифодаи об сарпечӣ мекунанд ва ин амал боис гардидааст, ки қарздории корхонаи обу ташноби вилоят дар назди ширкати барқии «Помир Энерҷӣ» ба 1,5 миллион сомонӣ ва мақомоти андоз наздики 680 сомонӣ расидааст.

- Айни замон аз тарафи Бонки аврупоӣ барои таҷдиди насосҳои идораи обу ташноб 4,5 миллион доллари ШМА ҷудо гардидааст. Марҳилаи аввали кор дар ин самт аз моҳи феврали соли равон оғоз меёбад. Мутаассифона дар шаҳри Хоруғ 200 манзили сокинон ғайриқонунӣ болои қубурҳои обу ташноб сохта шудаанд, ки ҳоло барои вусъат додани кор халал мерасонанд, - афзуд Тоҳир Паҳлавонов.