Дар асоси нақшаи чорабиниҳои тасдиқгардидаи якҷояи Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо Вазорати мудофиаи Ҷумҳурии Тоҷикистон дар қисми ҳарбии 01123-и Вазорати мудофиаи Ҷумҳурии Тоҷикистон дар шаҳри Хоруғи Вилояти Мухтори Кӯҳистони Бадахшон чорабиниҳои хусусияти ҳарбӣ - ватандӯстидошта гузаронида шуд.

Чорабинии мазкур бо пешниҳоди намоиши яроқу аслиҳа оғоз гардида, дар чорабинӣ Иброҳимзода Амир, сардори Раёсати тарбияи ватандӯстии дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон, роҳбарияти қисми ҳарбӣ ва масъулини Раёсати кор бо ҷавонон ва варзиш дар Вилояти Мухтори Кӯҳистони Бадахшон иштирок ва суханронӣ намуданд.

Дар оғози суханронӣ сардори Раёсати ватандӯстии дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хизматчиёни ҳарбиро аз номи роҳбарияти Кумита бахшида ба таҷлили Рӯзи Истиқлоли давлатии Ҷумҳурии Тоҷикистон самимона табрику муборакбод намуда, қайд кард, ки Истиқлоли давлатӣ яке аз дастовардҳои беназири кишварамон маҳсуб ёфта, бо заҳмату талошҳои пайвастаи Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон ба даст омада, дар ин давра барои кулли ҷавонону варзишгаронамон шароити хуби зиндагӣ таъмин гардид.

Дар идомаи суханронӣ иброз шуд, ки дар ин давра шароити сарбозону афсарон аз лиҳози моддиву маънавӣ ва дастрасӣ бо техникаҳои муосир беҳтар гардида, аз ҷавонон танҳои зиракиву ҳушёрӣ, хизмати содиқонаву софдилона ба халқу Ватан, эҳтиром ва ҳимояи арзишҳои миллӣ, ҳифзи муқаддасоти давлатӣ ва поку беолоиш нигоҳ доштани ҳар ваҷаб гулу гиёҳ ва хоки муқаддаси ин сарзамин талаб мешавад.

Мавриди зикр аст, ки дар идома мусобиқаҳои хурди варзишӣ, аз қабили дастхобонӣ миёни сарбозон гузаронида шуда, дар фарҷом як қатор афсарону сарбозон барои хизмати содиқонаашон дар сафи Қувваҳои Мусаллаҳи Ҷумҳурии Тоҷикистон бо сипосномаҳои Кумитаи кор бо ҷавонон ва варзиш сарфароз гардонида шуданд.