МУАЛЛИФ: МАШҲУР ИМОМНАЗАРОВ

Ҳайдар Гулмамадов, сардори Шуъбаи меъморӣ ва шаҳрсозии ВМКБ зимни нишасти хабарӣ гуфт, ки аз 8 нақшаи генералии шаҳру навоҳии вилоят 6-тоаш қабул шуданд. Нақшаҳои генералии ноҳияҳои Дарвоз ва Мурғоб ба итмом расонида шуда, ба Ҳукумати ҷумҳурӣ пешниҳод гардид.

Соли сипаришуда 83 иншоот бо маблағи 198 млн. сомонӣ сохта, мавриди истифода қарор гирифтанд. Аз байни иншооти сохташуда бинои 9-ошёнаи маркази вилоят аҳамияти аввалиндараҷа дорад, яъне теъдоди бештари сокинони Хоруғ дар он ҷой дода мешаванд.

Дар иншоот 99 фоизи корҳо аллакай ба итмом расонида шуда, қабати аввали он рӯзҳои наздик мавриди баҳрабардорӣ қарор мегирад. Лоиҳаи сохтмони театри вилоятӣ низ аз санҷиш гузашта, баъди кӯчондани 5 хонаи истиқоматӣ ба бинои 9-ошёнаву фароҳам овардани шароитҳо барои сокинон, корҳои сохтмонии театр низ оғоз меёбад.

- Соли 2016 дар шаҳру ноҳияҳои вилоят 23 корхонаи нави саноатӣ таъсис ёфтанд, ки дар онҳо 207 нафар бо ҷойи кори доимӣ таъмин гардиданд, – изҳор дошт Латиф Шоҳзодаев, сардори Раёсати рушди иқтисод ва савдои ВМКБ. Раёсат дар ҳамбастагӣ бо шарикони рушд дар 43 ҷамоати деҳот, ки дар 39-тоаш «Барномаи рушди иқтисоди минтақавӣ» амалӣ шудааст, мониторинги иқтисодӣ гузаронид.