Дар ярмаркаи соҳавии ҷойҳои кории холӣ ва фаъолиятҳои озод, ки аз ҷониби Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар ҳамкорӣ бо Вазорати меҳнат, муҳоҷират ва шуғли аҳолии кишвар дар маркази ВМКБ, шаҳри Хоруғ гузаронида шуд, 40 идораву ташкилот ва корхонаҳои вилоят ширкат намуда, барои беш аз 900 нафар корҷӯ ҷойи кории нав ва машғулиятҳои гуногун пешниҳод карда шуд.

Тавре Париноз Азизӣ, ташкилкунандаи ярмарка иттилоъ дод, феълан дар ҳудуди вилоят кору вазифаҳои озод мавҷуданд, аммо дар самти муҳоҷирати меҳнатӣ ҷойи кор дастрастар аст.

- Ҳоло барои шаҳрвандон нафақат дар Федератсияи Русия, балки дар кишварҳои Ҷопон, Лаҳистон, Олмон, Туркия ва мамлакатҳои дигар шароити корӣ муҳайё карда шудааст. Дар қайди Шуъбаи агентии давлатии меҳнат, муҳоҷират ва шуғли аҳолии вилоят 2047 нафар шаҳрванди бекор ба қайд гирифта шуда, ҷиҳати озими сафар кардан ба давлатҳои хориҷа теъдоде аз онҳо пешакӣ худро номнавис намудаанд. Шахрвандон дар ояндаи наздик ҳам дар кишвари хеш ва ҳам берун аз он соҳиби ҷойи кор мегарданд. Ғайр аз ин марказҳои бозомӯзӣ дар Хоруғ ва ноҳияҳои ВМКБ аз қабили муассисаи давлатии Маркази таълимии калонсолон дар ҷодаи тақвияти ихтисос ва касбомӯзӣ фаъолияти пурсамарро ба роҳ мондаанд, ки ҳамарӯза шаҳрвандони зиёд ба онҳо муроҷиат мекунанд, – гуфт Паринози Азизӣ.

Машҳур ИМОМНАЗАРОВ, “ҶТ”