Бо вуҷуди аз ҷониби идораҳои давлатии беҳдошти замин ва обёрии шаҳру ноҳияҳои ҷумҳурӣ бо оби полезӣ сари вақт ва пурра таъмин гардидани истифодабарандагон, аз ҷониби онҳо, хосса кишоварзон, ҳаққи хизмати обрасонӣ сари вақт ва бо ҳаҷми пурра пардохт карда намешавад. Ин аст, ки қарзҳо аз ин ҳисоб афзоиш ёфта, бақияи он бо дарназардошти солҳои пеш беш аз 234 млн. сомониро ташкил додааст.

Ин нукта 25 июл зимни нишасти хабарии Агентии беҳдошти замин ва обёрии назди Ҳукумати Ҷумҳурии Тоҷикистон баён гардид.

Тавре Зафарбек Давлатзода, директори Агентӣ изҳор дошт, ин ҳолат боиси афзоиши қарзҳои кредиторӣ, аз ҷумла қарзи суғуртаи иҷтимоӣ ва ҳамаи намуди андозҳо гардидааст.

Зикр гардид, ки дар мавсими обёрии соли 2024 тавассути пойгоҳҳои обкашӣ ва чоҳҳои амудӣ дар шаҳру ноҳияҳои ҷумҳурӣ бо истифодаи то 7,3 млн. кВт/соат неруи барқ дар як шабонарӯз то 380 адад дастгоҳҳои обкашӣ ва то 51 адад чоҳҳои амудӣ фаъолият намуда, кишоварзонро бо оби обёрӣ таъмин намудаанд.

Ҳамчунин, дар доираи "Барномаи беҳтар намудани вазъи мелиоративии заминҳои кишоварзии Ҷумҳурии Тоҷикистон" давоми соли 2024 беҳтар намудани ҳолати мелиоративии 9811 гектар заминҳои кишоварзӣ ба нақша гирифта шуда, корҳо дар ин самт идома доранд.