Бахшида ба рӯзи Конститутсия, 5 ноябр, дар Пажӯҳишгоҳи илмӣ-таҳқиқотии фарҳанг ва иттилооти Вазорати фарҳанг бо иштироки васеи ходимони илмӣ, кормандони Пажӯҳишгоҳ ва намояндагони ВАО таҳти унвони “Конститутсия ва рушди фарҳанги миллӣ” мизи мудаввар баргузор гардид.

Шариф Комилзода, директори Пажӯҳишгоҳ, зимни суханони ифтитоҳии хеш Конститутсияро яке аз асоситарин дастовардҳо дар таърихи давлатдории навини халқи тоҷик унвон карда, онро ҳамчун ҳуҷҷати муҳиму сарнавиштсоз ва танзимкунандаи тамоми масъалаҳои ҳаёти сиёсӣ, иқтисодӣ ва иҷтимоиву фарҳангии кишвар арзёбӣ кард.

“Пеш аз ҳама қабули ин сарчашмаи қонун моро ба ҳам овард, сарҷамъу муттаҳид сохт, ваҳдати сиёсии халқро таъмин намуд, роҳи ояндаи ҳастии мо–бунёди давлати соҳибихтиёр, демократӣ, ҳуқуқбунёд, дунявӣ, ва ягонаро, ки барои ҳар як инсон шароити зиндагии арзанда ва инкишофи озодонаро фароҳам меорад, роҳбаладӣ намуд. Ин ҳуҷҷатест, ки дар он иродаи мардум, принсипҳо ва меъёрҳои асосии ташкили ҳаёти ҷамъиятӣ ва давлатӣ муқаррар мегардад. Қабули Конститутсия агар, аз як тараф, дастоварди таърихӣ бошад, аз ҷониби дигар, татбиқи меъёрҳои он, таъмини қонуният ва тартиботи ҳуқуқӣ, арҷгузорӣ ба фарҳангу арзишҳои миллӣ дар ҷумҳурӣ ба ҳисоб меравад. Арзишҳои ин ҳуҷҷати муҳим инъикосгари сиёсати инсондўстонаю инсонпарварона ва эътирофу эҳтиром ба ҳуқуқу озодиҳои инсон ва шаҳрванд будани он маҳсуб гардида, шаҳодати ин нуқта озодии баён, матбуот, виҷдон ва дин дар Тоҷикистон аст”, - гуфт дар идомаи суханронии хеш Шариф Комилзода.

Профессор Мурод Муродов дар мавзуи “Кафолати озодии сухан ва табъу нашр дар Конститутсияи Ҷумҳурии Тоҷикистон” маъруза карда, ин ҳуҷҷати тақдирсозро заминаи асосӣ дар рушди минбаъдаи фарҳангу ҳунар ва озодии матбуот дар кишвар маънидод намуд. Ӯ ҳамчунин афзуд, ки маҳз Конститутсия сабабгори ба вуҷуд омадани як зумра қонунҳои вобаста ба матбуот ва дигар ВАО гардид. “Бешак Конститутсияи кунунӣ замина фароҳам овард, ки мо қонунҳое амсоли Қонуни Ҷумҳурии Тоҷикистон “Дар бораи матбуот ва дигар васоити ахбори омма”, Қонуни Ҷумҳурии Тоҷикистон “Дар бораи сирри давлатӣ”, Қонуни Ҷумҳурии Тоҷикистон “Дар бораи иттилоот”, Қонуни Ҷумҳурии Тоҷикистон “Дар бораи табъу нашр” ва амсоли инҳо қабул ва мавриди истифода қарор гиранд”.

Ӯ дар идомаи маърузааш таъкид кард, ки Конститутсия дар боло бурдани арзишҳои маънавии ҷомеа нақши калидӣ бозида, дар пешрафти соҳаҳои фарҳанг, адабиёт ва илм хизмати шоён кардааст. Мурод Муродов гуфт: “Мо айни ҳол осори классикон ва муосиронро дар силсилаи “Ахтарони адаб” таҳия карда истодаем ва дар ин силсила-китобҳо баъзе маводҳое таҳия мешаванд, ки дар замони Шуравӣ умуман гуфтану навиштан ва паҳн кардани онҳо мамнуъ буд. Масалан Мавлоноро ба ҷуз чанд муҳаққиқ касе намешинохт ва ин аз кафолатҳои додаи Конститутсия доир ба рушди фарҳангу маънавиёт аст”.

Фирдавс Шарифзода, номзади илмҳои таърих, дар маърӯзаи худ доир ба “Нақши Конститутсия дар рушди қонунгузории соҳаи фарҳанг” суханронӣ намуда, иброз дошт, ки Конститутсия барои оромии мардум ва пойдории сулҳу суботи кишвар ва боло бурдани фарҳангу маънавиёт саҳми калонро мебозад. Аз ин хотир мебояд барои гиромидошти он, ки воқеан арзиши олиро соҳиб аст, пайваста талош варзем.

Дар хотима миёни маърӯзачиён ва иштирокдорони мизи мудаввар суолу ҷавоб сурат гирифта, сипас китобҳои тозанашр доир ба конститутсия намоиш дода шуд.