МУАЛЛИФ: УМЕД МИРЗОЕВ

Тибқи нақшаи чорабиниҳои Раёсати ҷавонон, варзиш ва сайёҳии вилояти Хатлон дар ҳамкори бо мақомоти иҷроияи маҳаллии ҳокимияти давлатии шаҳри Қӯрғонтеппа бахшида ба “Соли ҷавонон” дар мавзӯи “Нақши васоити ахбори омма дар инъикоси пешрафти ҷомеаи шаҳрвандӣ” конференсия баргузор шуд.

Дар он муовини раиси шаҳри Қӯрғонтеппа Солеҳа Қосимзода, сармуҳаррири ҳафтаномаи “Хатлон” Асалмоҳ Сафарова ва роҳбарони ташкилоту муассисаҳои шаҳр, ҷавонони фаъолу ташаббускор ширкат намуданд.

Солеҳа Қосимзода оид ба муҳтавои Паёми Пешвои миллат ба Маҷлиси Олӣ андешаҳои худро баён намуд. Инчунин, Мурод Сотиев, сармуҳаррири ҳафтаномаи “Новый Хатлон”, Усмон Тӯйчиев, сармуҳаррири ҳафтаномаи шаҳрии “Набзи Қӯрғонтеппа”дар бораи нақши ВАО дар пешрафти суботи ҷомеа фикру мулоҳизаи хешро иброз намуданд.

Гуфта шуд, ки МИҲД шаҳри Қӯрғонтеппа дар ҳар мулоқоту вохӯриҳо аз нерӯи зеҳнии журналистони ҷавон истифода мекунад ва нақши журналистикаро дар пешрафти иқтисодиёту иҷтимоиёти маркази вилояти Хатлон муҳим арзёбӣ менамояд.

Дар охир иштирокдорони конференсия пешниҳодҳои хешро дар мавриди хамкориашон бо ҳукумати маҳаллӣ ба унвони шаҳрдори Қӯрғонтеппа ирсол намуданд.