МУАЛЛИФ: БЕҲРӮЗ ХОЛМУРОДОВ

Соли 2016 аз ҷониби нозирони Кумитаи ҳифзи муҳити зисти назди Ҳукумати ҷумҳурӣ 18 377 санҷиши комплексӣ, соҳавӣ ва фаврӣ гузаронда шудааст.

Хайрулло Ибодзода, раиси Кумитаи ҳифзи муҳити зист зимни нишасти хабарӣ иброз дошт, ки дар натиҷаи санҷишҳо ба субъектҳои фаъолияти хоҷагидор барои риоя накардани талаботи қонунгузорӣ дар соҳаи ҳифзи муҳити зист 30 902 адад пешниҳодҳои иҷрояшон ҳатмӣ дода шуданд. Барои риоя накардани меъёру стандартҳои экологӣ ва вайрон намудани талаботи қонунгузории соҳавӣ нисбат ба 10 705 нафар шахсони воқеӣ ва ҳуқуқӣ чораҳои дахлдор андешида шуданд. Нисбат ба онҳо 1 миллиону 385,9 ҳазор сомонӣ ҷарима баста шуд, ки аз он 990 ҳазор сомонияш рӯёнда шуд.

Гуфта шуд, ки аз ҷониби Агентии обуҳавошиносии кумита соли гузашта 365 пешгӯии шабонарӯзӣ тартиб дода шуд, ки дурустии онҳо 87% - ро ташкил дод, ки нисбат ба ҳамин давраи соли гузашта 3% зиёд мебошад.

– Вобаста ба вазъи имрӯза 80 – 90 фисади пешгӯиҳо амалӣ гашта истодааст. Нисбат ба соли 2016 моҳи феврали зимистони имсола 2-4 дараҷа сардтар меояд. Мо муайян карда баромадем, ки дар моҳи феврал, яъне моҳи охири фасли сармо 11 рӯзи боришот аст”, - таъкид намуд масъули агентӣ.