Ё чаро бо вуҷуди паст шудани қурби доллар қимати маҳсулот тағйир намеёбад?

Бо фаро расидани моҳи шарифи Рамазон дар кишвар сокинон аз гаронии нарху навои маҳсулоти ниёзи аввалия шикоят мекунанд. Ба гуфтаи онҳо пештар баҳонаи тоҷирон боло рафтани қурби доллар буд, вале қурби ин асъори хориҷӣ ҳоло нисбатан поин омадааст, аммо нархҳо то ҳол бетағйиранд. Мақомоти марбута бо ташкили ярмаркаҳо талош доранд, нархҳоро дар ҳолати муътадил нигоҳ доранд.

Салина, як сокини шаҳри Душанбе мегӯяд, воқеан ҳам чанде қабл нарху наво бо таъсири баланд шудани қурби доллар афзоиш ёфт, вале имрӯз бо вуҷуди поин омадани қурби доллар ва баланд шудани рубли русӣ то ҳол нархҳо бетағйир боқӣ мондаанд.

“Моҳи шарифи Рамазон пеш аз ҳама моҳи хайру саховат ва адлу инсоф аст, ки ба ҳар як банда Худованд худаш тавфиқ диҳад. Вале чунин ба назар мерасад, ки тоҷирон бо вуҷуди поин омадани қурби доллар нарху наворо тағйир надоданд. Яъне тоҷирон ҳар гунае хоҳанд, ҳамон гуна нархгузорӣ мекунанд ва ҳатто сабзавотҳое ба монанди пиёзи сабз ва амсоли инро низ ба доллар рабт медиҳанд, ки аз мантиқ дур аст”,-мегӯяд ҳамсуҳбати мо.

Умед як сокини ноҳияи Ёвон мегӯяд, дар Рамазон бархе аз нархҳои ниёзи аввалияи мардум, ки як моҳ қабл баланд шуда буданд, бетағйир боқӣ мондаанд, вале нархи орд дар муқоиса бо як моҳ пеш гаронтар шудааст.

- Масалан, як моҳ қабл ман орди навъи якумро 330 сомонӣ харидорӣ карда будам, вале имрӯз нарх баланд шудааст ва он дар бозори ноҳияи Ёвон 370 сомонӣ арзиш дорад. Вале нархҳои дигар ҳамон гуна боқӣ мондаанд ва дар моҳи Рамазон тағйироти ҷиддие нашудааст. Вале бо вуҷуди паст шудани қурби доллар ҳеҷ тағйироте дар нархҳо дида намешавад,-гуфт ҳамсуҳбати мо.

Гароншавии нарху наво дар кишвар як моҳ пеш аз Рамазон оғоз шуд. Аз ҷумла, орд, равған, шакар ва маҳсулоти дигари ниёзи аввал қимат шуданд. Соҳибкорон ҳамеша ба баланд шудани қурби доллар таъкид мекунанд ва мегӯянд, ки дар баъзе аз мавридҳо гузоштани нарху наво аз онҳо вобастагӣ надорад.
Анушервон, як тоҷир, ки ба фурӯши маҳсулоти ниёзи аввалияи мардум машғул аст, мегӯяд, воқеан ҳам ӯ маҳсулотро аз яклухтфурӯшон бо нархи гарон харидорӣ мекунад ва наметавонад, ки онро арзон ба фурӯш гузорад.

- Мо аз нуқтаҳои яклухтфурӯшӣ маҳсулотро харидорӣ мекунем ва вақте ба мо бо нархи гарон медиҳанд, наметавонем, ки онро арзон фурӯшем. Мо маҷбур мешавем, чанд тангаи дигар болои он монему ба фурӯш гузорем,-илова намуд ин тоҷири тоҷик.

ТАЪКИДИ АБДУҚОДИРЗОДА БА СОҲИБКОРОНУ ТОҶИРОН

Саидмукаррам Абдуқодирзода, раиси Шӯрои уламои Ҷумҳурии Тоҷикистон дар суҳбат бо АМИТ “Ховар” ба соҳибкорон ва тоҷирон таъкид намуд, ки Рамазон на танҳо моҳи имтиҳони неруи ҷисмонӣ ва парҳез аз ғизо, балки имтиҳони вазъи руҳиву равонӣ ва покизагии нияту аъмол ҳам ҳаст. “Ин нукта ба онҳое дахл дорад, ки барои хидматрасонӣ ба мардум масъуланд”, -гуфт ӯ.

Ба таъкиди Абдуқодирзода, ба таври сунъӣ боло бардоштани нарху навои бозор ба хотири фоидаи бештар гирифтан дар ин моҳ амали бадтаринест, ки дар дини мубини ислом мавриди маҳкумият қарор гирифтааст.

Раиси Шӯрои уламо мегӯяд, дар ин моҳ баъзе соҳибкорон ва ё шахсоне, ки бозорнишинанд, ба таври сунъӣ ба боло бурдани нархҳо даст мезананд, дар ҳоле ки мо камбуди рӯған, орд, меваҷот надорем, ҳама анборҳо пур аз ин неъматҳост.

"Ҳоло ба таври сунъӣ баланд бардоштани нархи маводи мавриди ниёзи аввал, бардоштани нархи дигар маҳсулот, умуман сӯиистифода аз моҳи мубораки Рамазон ё рӯзҳои мубораки ид бисёр гуноҳи азим буда, пайомадҳои нохуш низ дорад", - таъкид кардааст ӯ.

Нафароне, ки нархро ба таври сунъӣ боло мебардоранд, ба гуфтаи Абдуқодирзода, маблағе, ки ба даст меоранд, ба онҳо ба ҷуз нигарониву нокомӣ ва парешониву ташвишҳо чизе намедиҳад. Ва аз тамоми бозорнишинон ва фурӯшандаҳо дархост кард, ки дар моҳи мубораки Рамазон хайру эҳсонро пеша кунанд, нархҳоро на боло, балки ба миқдоре поин фароранд, ки ин беподош нахоҳад монд.

БОЛОРАВИИ НАРХҲО, ТАЪСИРИ  НООРОМИИ БАРХЕ АЗ КИШВАРҲО

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯзи 1-уми апрел дар Паёми шодбошӣ ба муносибати фаро расидани моҳи шарифи Рамазон гуфтанд, болоравии нархҳо ва авзои бисёр ноорому бесуботи баъзе минтақаву кишварҳои сайёра ҷомеаро ба ташвиш овардааст.
Сарвари давлат ҳамзамон дар паёмашон гуфта буданд, болоравии нархҳо ва авзои бисёр ноорому бесуботи баъзе минтақаву кишварҳои сайёра ба вазъияти иқтисодиву иҷтимоии қариб ҳамаи давлатҳои ҷаҳон, аз ҷумла Тоҷикистон таъсири ҷиддӣ расонида истодааст.

Президент таъкид доштанд, ки дар ин моҳи муборак, баробари ба ҷо овардани фаризаву суннатҳои динӣ, иҷрои амалҳои солеҳ, аз ҷумла хайру эҳсон ва дастгириву навозиши ятимону маъюбон ва камбизоатҳову муҳтоҷон аз сифатҳои шоиставу башардӯстонаи ҳар як мусулмони савобҷӯ мебошад.

“Бовар дорам, ки на танҳо соҳибкорону тоҷирон, балки ҳар як инсони хайрхоҳу ҳимматбаланд дар ин моҳи шариф иқдому аъмоли неку писандидаи худро густариш мебахшад ва бо саховату ҷавонмардӣ намунаи ибрат нишон дода, соҳиби савоби зиёд мегардад”,-иброз доштанд Сарвари давлат.

Ҳамзамон таъкид намуданд, ки мардуми Тоҷикистон бояд ҳар рӯзи баҳорро ғанимат дониста, кишти зироатҳоро сари вақт анҷом диҳанд ва барои ҳосили фаровон замина гузоранду масъалаи захираи дусолаи маводи ғизоиро дар ҳар як оила, ки мардум манфиати онро солҳои охир, бахусус дар ду соли вазнини паҳншавии бемории сироятии коронавирус диданд, фаромӯш накунанд.

“Мо, аллакай, имрӯз бояд дар фикри он бошем, ки фарзандон ва аҳли хонадони мо ва умуман сокинони кишвар ба мушкилӣ дучор нагарданд ва аз камчинии маводи ғизоӣ ё болоравии нархи он, хусусан дар мавсими тирамоҳу зимистони дарпешис-тода азияту муҳтоҷӣ накашанд”, - гуфтанд Пешвои миллат.
Президенти мамлакат илова намуданд, ки Ҳукумати кишвар бо мақсади ҳимояи иқтисодиёт ва сокинони ҷумҳурӣ аз таъсири вазъи бамиёномада бо истифода аз тамоми захираву имкониятҳои мавҷуда ҳамаи тадбирҳои заруриро амалӣ карда истодааст.

Мақомоти дахлдори кишвар аз оғози моҳи шарифи Рамазон ба хотири ба танзим даровардани нарху наво дар бозорҳои кишвар ва идҳои дигар ярмаркаҳо ташкил мекунанд. Аз ҷумла, чунин ярмаркаҳо дар бозорҳои калонтарини шаҳри Душанбе - “Меҳргон”, “Саховат” ва “Деҳқон” бештар ба назар мерасанд. Дар ин ярмаркаҳо маҳсулоти нисбатан арзон ба фурӯш гузошта мешавад. Вале сокинон мегӯянд баргузории чунин ярмаркаҳо бояд бештар шавад, то ин ки ҳамагон тавонанд аз он ҷойҳо харидорӣ кунанд.