25-уми январ дар шаҳри Душанбе фаъолияти солонаи Раёсати кор бо ҷавонон ва варзиши шаҳри Душанбе натиҷагирӣ карда шуд.

Дар ҷаласаи ҷамъбастии мазкур Дилбар Одилзода, муовини раиси шаҳри Душанбе, Шабнам Раҳимзода, муовини якуми раиси Кумитаи кор бо ҷавонон ва варзиши назди Ҳукумати кишвар ва Шоҳзод Раҳимзода, сардори Раёсати кор бо ҷавонон ва варзиши шаҳри Душанбе иштироку суханронӣ намуданд.

Шоҳзод Раҳимзода, сардори Раёсати кор бо ҷавонон ва варзиши шаҳри Душанбе ҷаласаро ифтитоҳ намуда, доир ба фаъолияти Раёсат дар соли 2023 суханронӣ намуд.

Дар идома Дилбар Одилзода, муовини раиси шаҳри Душанбе баромад кард. Ӯ зимни суханронии хеш доир ба масъалаҳои тарбияи ватандӯстии ҷавонон, ҷинояткорӣ миёни ноболиғону ҷавонон ва бегонапарастӣ миёни ин қишри ҷомеа ибрози назар намуд.

Номбурда ҳамзамон масъалаҳои тақвият бахшидани корҳои тарғиботию ташвиқотӣ дар самти татбиқи сиёсати давлатии ҷавонон, варзиш ва тарзи ҳаёти солим, рушд бахшидани фаъолияти волонтёрӣ, тарғиби фарҳанги шаҳрнишинӣ ва таҳсилоти муносиби наврасону ҷавонони пойтахтро мавриди таҳлилу баррасӣ қарор дода, барои рафъи мушкилиҳои ҷойдоштаи соҳа дастуру супоришҳои мушаххас дод.