Ин нуктаро 14 июл Фарҳодшоҳ Раҳмонализода, раиси Палатаи савдо ва саноати Ҷумҳурии Тоҷикистон зимни нишасти хабарӣ ба рӯзноманигорон иттилоъ дод.

Ба гуфтаи ӯ, дар давраи ҳисоботӣ, Палата дар ташкил ва баргузории 17 намоишгоҳи дохилӣ ва хориҷӣ мусоидат намуда, инчунин иштироки аъзоёни худ ва соҳибкорони ватаниро дар кори онҳо таъмин намудааст, ки нисбат ба ҳамин давраи соли гузашта 1 адад зиёд мебошад.

- Дар ин давра Палата дар 12 намоишгоҳи байналмилалии дар хориҷи кишвар баргузоргардида дар муаррифии молу маҳсулоти ватанӣ саҳми арзандаи худро гузошт ва иштироки соҳибкорони кишварро таъмин намуд, - гуфт раиси ниҳоди мазкур.

Таъкид гардид, ки дар доираи намоишгоҳҳои баргузоргардида, ширкатҳои ватанӣ бо шарикони нави худ 355 адад санади ҳамкорӣ, аз ҷумла 90 шартномаи ҳамкорӣ ва 113 ёддошти тафоҳуми ҳамкорӣ оид ба содироти молу маҳсулот аз кишвар ба хориҷ ва боқимонда санадҳо, аз ҷумла 40 шартномаи ҳамкорӣ ва 103 ёддошти тафоҳуми ҳамкорӣ оид ба харид ва фурӯши маҳсулотро ба имзо расониданд.

Г. КАРИМОВА, “ҶТ”