Ӯро чун навраси дорои хислатҳои хуби инсонӣ васф мекунанд. Хислатҳое монанди боинтизомӣ, меҳнатдӯстӣ ва устуворӣ дар ҳадафи хеш. Ҳарчанд хонандаи мактаб аст, вале бо ин рафторҳо миёни ҳамсинфон шинохта шудаву фарқ мекунад. Ӯ аз синфҳои поёнӣ ба фанҳои математикаву информатика муҳаббати зиёд дошт ва ин боис гашта, ки чун навраси масъулиятшинос ба воя расад. Ин фанҳоро хуб медонаду меомӯзад ва ҳамарӯза дониши хешро аз ин фанҳо зиёд мегардонад.

Ӯ аз ҷумлаи хонандагонест, ки ҷасурона дар озмуну олимпиадаҳои мактабиву онлайнӣ ва байналмилалӣ иштирок мекунад ва аз сабқат бо дигарон тарсе надорад. Аз шикастҳои худ дарс мегирад ва соли оянда беҳтар аз соли қабл омода мешавад, то эродҳои гуфташуда бартараф гардаду ғолибияташ воқеӣ бошад.

Ӯ моҳи декабри соли қабл дар шаҳри Пномпени Шоҳигарии Камбоҷа дар Олимпиадаи байналмилалии математикии Ангкор (AMС–2025) соҳиби медали тилло аз фанни математика гардид, ки дар ин олимпиадаи бонуфуз беш аз 1600 нафар хонанда аз 13 кишвари дунё иштирок намуда буд.

Мо атрофи Анисҷони Абдусамад, хонандаи синфи 10-и “Мактаби Президентӣ барои хонандагони болаёқат” дар шаҳри Кӯлоб ҳарф мезанем, ки дар олимпиадаи мазкур дар қатори дигар хонандагон сатҳи донишу маҳорати зеҳнии худро нишон дода, обрӯи илми тоҷикро дар арсаи байналмилалӣ боз ҳам баланд бардошт.

Анисҷон атрофи олимпиадаи мазкур гуфт, ки он дар сатҳи хело олӣ доир гардида, хотираҳои беҳтаринро дар зеҳнаш боқӣ гузошт:

“Аслан, иштирокчии олимпиадаҳо аз математика нестам, аммо онро дар равиши дарсҳо хуб мехонам. Аз ин рӯ, устодам ба ман маслиҳат доданд, ки донишамро аз фанни мазкур санҷам. Чун бори аввал буд, ки дар олимпиадаи байналмилалӣ ширкат мекардам, барои он тайёрии ҳамаҷониба дида ва хушбахтона ба гирифтани медали тилло даст ёфтам. Натиҷаҳои бадастовардаи дигар рафиқонам низ хуб буд ва он бозгӯи сатҳи баланди омодагии хонандагони муассисаҳои таълимии кишвар берун аз Тоҷикистон мебошад”.

Ин навраси дӯстдори фанҳои дақиқ тайи чанд соли охир иштирокчии фаъоли Олимпиадаи фаннии хонандагон аз фанни технологияи иттилоотӣ ва борҳо ғолиби ҷойҳои намоён мебошад. Боз ғолиби ҷойи якум дар озмуни “Беҳтарин барномасоз ва донандаи зеҳни сунъӣ” миёни хонандагони муассисаҳои таҳсилоти миёнаи умумӣ, литсейҳо ва гимназияи шаҳри Кӯлоб дар соли 2025, инчунин, барандаи стипендияи Президенти Ҷумҳурии Тоҷикистон дар соли таҳсили 2024-2025 аст.

Ӯ ёдовар шуд, ки муҳити мактабӣ барои рушди истеъдоди ҳар хонанда бисёр муҳим ва ҳатто ҳалкунанда ҳам буда метавонад.
- Бисёри хонандагон худ намедонанд, ки чӣ истеъдод доранд. Муаллимони босавод, озмунҳо, олимпиадаҳо ва дарсҳои ҷолиб метавонанд истеъдоди онҳоро кашф кунанд. Баъдан, агар дар мактаб муаллимон хонандагонро ҳавасманд кунанд, меҳнати онҳо қадр карда шавад ва хато ҳамчун таҷриба қабул шавад, он замон хонанда ҷуръат мекунад, то пеш равад ва рушд ёбад, - мегӯяд номбурда.

Ба гуфти ӯ ҳамаи хонандагон дорои истеъдоди якхела нестанд. Вай иброз дошт: “Ман мехостам маҳфилҳои ҳатмӣ аз рӯйи шавқ (IT, фанҳои дақиқ, забонҳо ва касбу ҳунару варзиш) ташкил гардад ва бо ин восита ҳар наврас истеъдоди худро рушд диҳад ва оянда дар кадом самт таҳсилу фаъолият кардани худро аз ҳоло донад”.

Ӯ ба хонандагоне, ки орзуи иштирок дар олимпиадаҳои байналмилалиро доранд, чунин гуфт:

- Аз китобҳо, курсҳо, видеодарсҳои муаллимони пуртаҷриба ва иштирокчиёни чунин олимпиадаҳо истифода баред. Интизом ва сабрро дар ин роҳ пеш гиред. Роҳи иштирок дар олимпиада осон нест. Баъзан кӯшишҳо натиҷаи дилхоҳ намедиҳанд, вале аз он касе мебарад, ки таслим намешавад ва барои ҳадафи хеш талош менамояд. Муҳим ба худ бовар кунед ва ҳадафи худро дунбол намоед. Хулоса, калиди муваффақият дар ҳамаи корҳо меҳнат, устуворӣ, сабр ва бовар ба худ аст.

Қаҳрамони мо дар оилаи таҳсилкарда ба дунё омадаву зери дастони модари омӯзгор тарбият меёбад. Волидон барои тарбияи дурусташ муҳити ором фароҳам оварда, ӯро ба меҳнат ва масъулиятшиносӣ ҳидоят менамоянд. Тавре модараш Дилангез Шамсова таъкид мекунад:

“Ҳамчун модар дастгирии ман бештар маънавӣ аст . Ҳамеша ӯро ташвиқ мекунам, ки ба худ бовар дошта бошад ва роҳи илмро идома диҳад. Тамоми дастовардҳои фарзандам то ин дам натиҷаи заҳмат ва кӯшишҳои худи ӯст. Мо доимо тасмимҳои ӯро пуштибонӣ ва дастгирӣ менамоем”.

Дилангез Шамсова иброз дошт, ки аз дастоварди ахири фарзанди худ ифтихори беандоза дорад. Он нишонаи заҳмати пайваста, истеъдоди фитрӣ ва иродаи қавиаш аст.

- Интизор дорам, ки ӯ дар оянда шахси донишманд, мутахассиси хуб ва инсони муфид барои ҷомеа шавад. Орзу мекунам, ки донишу таҷрибаи худро барои пешрафти илму техника ва шукуфоии ватани азизамон истифода барад, - қайд намуд модари Анисҷон.

Ӯ қасд дорад, ки роҳи худро идома дода ва ба дастовардҳои бештар аз ин ноил гардад. Яке аз мақсадҳои асосиаш дар соли равон ширкат дар озмуни “Илм - фурӯғи маърифат” аз рӯи номинатсияи зеҳни сунъӣ ва барномасозӣ мебошад. Анисҷон мехоҳад бо ин роҳ аввалин қадамҳои худро дар ҷодаи барномасозӣ гузорад ва оянда таҳсили худро дар ин ришта идома диҳад. Ӯ орзуи ғолибият дар ин озмунро дорад.

Гулафшон КАРИМОВА, “ҶТ”