ҶОМЕА
Панҷшанбе 30 Июн 2022 09:53
8769
Мегӯянд, ки рӯзноманигорон чун муаррихону мардумшиносон, муҳаққиқону фарҳангшиносон таърихро менависанд, онро месозанд. Ба ин маъно, ки бо навиштани хабару мақолаҳо, ба қавле машғули солноманигориянд. Дар ин гуфтаҳо шояд ҳақиқате нуҳуфта бошад. Зеро бо гузашти солҳо агар ба нафаре маълумоте лозим гардад, пас ба рӯзномаҳои солҳои пеш нашршуда ҳатман рӯ меорад. Бастаҳоро варақ гардонда, маълумоти лозимаро аз саҳифаҳои бо мурурри вақт зардшуда, дарёфт месозад...

РУҶУЪ

Агар ҳақиқати ҳолро гӯем, рӯзноманигорӣ пешаест сангину вазнин ва хеле заҳматталаб. То андозае, ки рӯзноманигори қаламкаш натанҳо ҷисман, балки руҳан мондаю афгор мегардад. Ва дӯстдорону содиқони ин пеша ба душвориҳо, шабзиндадориву бедорхобиҳо нигоҳ накарда, пайи коранд. Зеро рисолати эшон чунин аст: расондани иттилоот ба оммаи хонандагон. Дар шароити имрӯза, ки ҳатто давлати соҳиби иттилооти муҳимро аз кишварҳи абарқудрати дорои яроқи ҳастаӣ ҳам пурқувват мешуморанд. Пас, дар расондани иттилоот саҳми рӯзноманигорон беандоза калан аст. То ҳаде, ки замоне Отто Бисмарк, сарвазири моҷароҷӯи Олмон сад сол пеш дар ҳақи рӯзноманигорон чунин як ҷумлаи таърихӣ иброз дошта буд: “Аз як рӯзноманигор даҳ вазир сохтан мумкин, лек аз даҳ вазир як рӯзноманигор сохтан нашояд”. Ин аст, ки ба ақидаи бархе аз муҳаққиқону коршиносони соҳа, матбуот ҳукумати чорум шумурда мешавад.

ҶАВОНИ МАСЪУЛИЯТШИНОС

Ва ин руҷӯъ ба он хотир буд, ки ин ҷо сухан дар бораи яке аз қаламкашони рӯзноманигор меравад. Рӯзноманигоре, ки то кунун дар ин ҷода заҳмат мекашад, то иттилоот ба аҳли ҷомеа, афроди касбу кори гуногун сари вақт расонда шавад. Ин ҳам бошад, Самариддин Асозода, ки замоне вазифаи пурмасъулияти сардабирии рӯзномаи “Ҷавонони Тоҷикистон”–ро ба уҳда дошт. Ҳоло вазифаи боз ҳам пурмасъулият – сардабирии рӯзномаи порлумонии “Садои мардум”–ро бар дӯш дорад.

Самариддин боре дар суҳбати хосе иброз дошта буд, ки солҳои душвори навадуми асри пешин, ҳангоме рӯзноманигор ва адиби маъруф, шодравон Сайф Раҳимзоди Афардӣ раиси Кумитаи телевизион ва радиои назди Ҳукумати ҷумҳурӣ маҳсуб меёфт, Самариддини нав хатмкардаи донишгоҳро ба кор таклиф мекунад. Ба вазифаи тамоман дигар, яъне ҳамчун хоҷагидор. Ба ӯ супориш мешавад, ки нақлиёти гуногуни хизматии кумитаро бо сӯзишворӣ таъмин созад.

Самариддини навкор дарҳол аз пайи иҷрои супориш мегардад. Ба ҷойҳои лозима сар халонда, бо чӣ қадар душворию азобҳое барои нақлиёти кумита сӯзишворӣ дастрас месозад. Баъдан Афардӣ ӯро назди хеш хонда, аз иҷрои супориш пурсон мешавад. Самариддини ҷавон ба раис мерасонад, ки тамоми зарфҳо бо маводи сӯзишворӣ пур ва ба анбори кумита кашонда оварда шудааст. Боварии раис ба гуфтаҳои ӯ намеояд. Ҳамроҳаш ба анбор омада, шахсан сарпӯши зарфҳоро кушода тафтиш карда мебинад. Яқин мегардад, ки корманди ҷавон ҳақиқати ҳолро гуфтааст. Ҳайрон мемонад, аз чунин кору кирдор. Охир то Самариддин афроди соҳибтаҷриба ба ин амал сарукор доштанд. Пайваста шикоят доштанд, ки сӯзишвории лозимаро гирифта наметавонанд. Раис меандешид, ки шояд мегирифтанд, лек чун гурги борондида бештар пайи обу лой кардани чунин маводи камёфту муҳим будаанд. Бовараш ба корманди ҷавон дучанд афзоиш ёфт. Ҳамин тавр, Самариддини ҷавон ба олами иттилоот, табъу нашр ворид шуда, баъдан корманди эҷодӣ гардид.

ҲАМКОРӢ БО “ҶАВОНОН...” ВА ПАЙВАСТАН БА ОН

Нахустин таҷрибаомӯзии камина солҳои донишҷӯӣ ба рӯз-номаи “Комсомоли Тоҷикистон” (ҳоло “Ҷавонон...”) рост омад. Ҳангоми фаъолият дар рӯзномаи “Садои мардум” нахустин новеллаам маҳз дар рӯзномаи “Ҷавонон...” ба табъ расид, ки Самариддин Асозода роҳбарии онро аллакай ба уҳда дошт. Пас аз фаъолият дар рӯзномаи нав-таъсиси “Муҳоҷир” –и Хадамоти муҳоҷират ва “Муҳандиси ҷавон” –и Донишгоҳи техникии Тоҷикистон ба номи М. Осимӣ қариб, ки бекор монда будам. Дӯст ва додархондам, шоир Мирзо Рустамзода занг зада, фаҳмонд, ки дар рӯзномаи “Ҷавонон...” ҷойи мусаҳҳеҳ холист. Метавонам ба кор оям. Ҳамроҳ ба ҳуҷраи сармуҳаррир Самариддин Асозода ворид шудем. Мирзо мақсади омаданро барояш баён дошт. Худ низ изҳор доштам, ки омодаам ба ҳайси мусаҳҳеҳ фаъолият намоям. Ғайриинтизор Самариддин суханҳое баён дошт, ки рости гап лолу ҳайрон мондам:

– Ака, бароят як шуъбаи нав таъсис медиҳем. Шуъбаи сиёсат ва иттилоот. Худат роҳбари он мешавӣ.

Аз он ки омода будам, ба сифати мусаҳҳеҳ фаъолият намоям, чун ин гуна суханҳоро баён дошт, ба риққат омадам. Мамнун гаштаю изҳори сипос намуда, ҳамроҳи Мирзо аз ҳуҷраи кори Самариддин берун шудем.
Ҳамин тавр, фаъолияти меҳнатиям дар рӯзномаи ягона барои ҷавонон, яъне “Ҷавонони Тоҷикистон” оғоз ёфт, ки то кунун идома дорад. Ҳарчанд шуъбаи навтаъсис мебоист вобаста ба масоили сиёсӣ мавод омода мекард, азбаски ба масоили иҷтимоӣ бештар шавқ доштам, дар ин мавзӯъ низ маводҳо омода мекардем.

РОҲБАРӢ БО УСУЛИ БА ХУД ХОС

Мувофиқи маълумот сар-муҳаррири “дарозумр” дар рӯзномаи “Ҷавонон...” адиб Ато Ҳамдам маҳсуб меёбад. Номбурда бори роҳбариро дар рӯзнома даҳ сол бар дӯш доштааст. Дар ҷойи дуюм маҳз Самариддин Асозода меистад. Вай нуҳ сол дар ин вазифа фаъолият намуд.

Албатта, дар ҳар гуна идораю ташкилот, ҳар роҳбар бо тарзу усули ба худ хос фаъолиятро ба роҳ мемонад. Замоне ба ҳайати эҷодии “Ҷавонон...” ворид шудам, хаёлам ҳамаи кормандон ба ҷавонии хеш нигоҳ накарда, соҳибтаҷрибаю соҳибқалам намуданд. Маҳмудҷони Усмон, Наврӯзи Қурбон, Ҳасани Азиз, Муҳаммадиқболи Ато, Ашрафи Афзал, Сайфиддин Суннатӣ, шоир Нуруллоҳи Ориф ва чанди дигар дар ҷодаи пурмазмуну таъсирбахш ба табъ расидани ҳар шумора сахт заҳмат мекашиданд. Ба қавле дар чоп ва нашри мақолаҳо ва вобаста ба масоили гуногун, инъикоси мавзӯъҳои рӯзмарра, рӯзнома шояд он солҳо нисбати дигар ҷаридаҳо хеле боло меистод. Инро худи хонандагон низ борҳо изҳор дошта буданд.
Дар баъзе рӯзномаҳо соати омаду рафт ба қайд гирифта мешуд. Гӯё ҷойи кори муҳосибон бошад ё ягон коргоҳи техникӣ. Ин ҳол дар “Ҷавонон...” вуҷуд надошт ва шукр, ки то кунун мушоҳида намегардад.

Солҳои донишҷӯӣ ба идораи рӯзномаи шаҳрии “Коммунисти Қӯрғонтеппа”, ки баъдан дар заминаи он рӯзномаи вилоятии “Ҳақиқати Қӯрғонтеппа”, дар собиқ вилояти Қӯрғонтеппа таъсис ёфт, сар мехалондам. Муҳаррири вақти он шахси бофарҳанг Теша Раҷаб аксар вақт ба ҳуҷраҳои кории кормандон ворид мегашт. Чун медид, нафаре аз кормандон мавзӯъ барои навиштан надоштаю бекор нишаст, хоҳиш мекард аз идора берун шуда, аз пайи дарёфти мавзӯъ шавад. Ба ин монанд рафторро Самариддин ҳам дошт. Мекӯшид ҳузури кормандон дар идора камтар бошаду бештар аз пайи дарёфти мавзӯъ барои навиштан бошанд. Бо ин васила рӯзнома хонданбобу рангин ба табъ расад.

Бисёриҳо фаъолият дар рӯзномаи “Ҷавонон...” – ро ҳамчун зинаи ҷаҳиш барои ноил шудан ба зинаҳои баланд меҳисобанд. Дар асл мумкин, ҳамин тавр ҳам бошад. Зеро нафарони зиёд маҳз дар рӯзнома фаъолият карда, пасон ба мартабаҳои баланд расиданд. Аз ҷумла, Самариддин Асозода низ. Сараввал ӯ ба ҳайси муовини аввали сармуҳаррири рӯзномаи “Ҷумҳурият” фаъолият намуд. Акнун тайи чанд соли охир аст, ки ҳамчун сармуҳаррир дар рӯзномаи “Садои мардум” ифои вазифа дорад.

Ҳамин тавр, бе муҳобо метавон гуфт, фаъолият дар рӯзномаи “Ҷавонон...” мактаби камолот ва сабзиш ёфтани бисёр қаламкашон аст. Ҳамчун нуқтаи такягоҳ ё муттако. Чунин насиб ба Самариддин Асозода низ насиб гардид, ки кунун ба синни мубораки панҷоҳ қадам ниҳод. Умед аст, фатҳи қуллаҳои боз ҳам баланди мурод насиби эшон гардад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

Июн 2022 c.