Баргузории Фестивали об ва барномаи фарҳангӣ дар доираи Конфронси оби Душанбе

Шоми 25 май дар доираи Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018–2028” дар Майдони шаршараи “Наврӯзгоҳ”-и пойтахт Фестивали об ва барномаи фарҳангӣ таҳти унвони “Об - манбаи ҳаёти инсоният” баргузор гардид.

Дар чорабинии мазкур муовини Сарвазири Ҷумҳурии Тоҷикистон Дилрабо Мансурӣ, намояндагони Мақомоти иҷроияи ҳокимияти давлатии шаҳри Душанбе, иштирокдорони Конфронси байналмилалии об, намояндагони воситаҳои ахбори омма ва меҳмонони дохиливу хориҷӣ ширкат варзиданд.

Дар доираи фестивал шаҳру ноҳияҳои ҷумҳурӣ дастовардҳо, намунаи ҳунарҳои мардумӣ ва санъати дастиро ба маърази тамошо гузоштанд. Аз ҷумла, намунаҳои кандакорӣ дар чӯб, ҷавоҳирот, атласу адрасбофӣ, сабадбофӣ, зардӯзӣ, чакан, гулдӯзӣ ва муҳрабофӣ пешниҳоди тамошобинон гардид. Ҳамчунин, навъҳои гуногуни хӯрокҳои миллӣ, меваҳои тару тоза ва хушк, инчунин маҳсулоти кишоварзӣ ба намоиш гузошта шуданд.

Бахши фарҳангии фестивал бо иштироки ҳунармандон ва аҳли санъат, фазои идона ва руҳияи дӯстиву якдилиро миёни меҳмонон ва сокинон бештар сохт.

Ёдовар мешавем, ки Конфронси чоруми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018–2028” аз 25 то 28 май бо ташаббуси Ҳукумати Ҷумҳурии Тоҷикистон дар ҳамкорӣ бо Созмони Милали Муттаҳид ва дигар шарикони рушд дар шаҳри Душанбе баргузор гашта истодааст.

Интизор меравад, ки дар кори конфронс намояндагони сатҳи баланди ҳукуматҳо ва кишварҳои аъзои Созмони Милали Муттаҳид, созмонҳои байналмилалию минтақавӣ, молиявӣ, муассисаҳои таҳқиқотӣ ва таълимӣ, бахши хусусӣ, созмонҳои ҷамъиятӣ ва ҷомеаи шаҳрвандӣ, инчунин созмонҳои занон, ҷавонон ва кӯдакон иштирок намоянд.

С. ҚИЁМИДДИН, “ҶТ”