Бо баргузории як маҳфил дар бинои "Шарқи озод" ёди журналистоне, ки ин ҷаҳонро тарк карданд, гиромӣ дошта шуд.

Сайёфи Мизроб, сардабири ҳафтаномаи "СССР", ки ташаббускори ин иқдом буд, гуфт, дар як соли охир наздики 20 журналист моро тарк кардаанд. Акбари Саттор - собиқ раиси Иттифоқи журналистони Тоҷикистон, Шарифи Мисайзод - ровии радио, Аброри Зоҳир - журналист ва нависандаи машҳур, Муҳаммадҷон Мирзошоев - собиқадори матбуот, Султон Мирзошоев, Бахтиёр Сафаров - хабарнигори телевизион, Асадулло Саъдуллоев - устоди қариб ҳамаи журналистон аз ҷумлаи онҳоянд.

Ҳамкорону ёру рафиқони фавтидагон аз лаҳзаҳои хотирмонашон бо онҳо ёдовар шуданд. Аз ҷумла гуфта шуд, набудани Акбари Саттор дар як соли охир ҳис мешавад. Бо рафтани ӯ иттиҳоди байни хабарнигорон ҳам дигар нест. Пешниҳод шуд, ки аз ҷониби созмонҳои журналистӣ Ҷоизаи "Журналисти навовар" ба номи Акбари Саттор таъсис дода шуда, ҳар сол дар рӯзи фавташ - 28 август, ки тасмим гирифта шудааст, ҳамчун рӯзи гиромидошти журналистон қайд гирифта шавад, ё дар Рӯзи матбуоти тоҷик тақдим гардад.

Ҳамчунин, пешниҳод шуд, ки осорхонаи журналистони тоҷик таъсис ёбад. Аз ҳамаи хабарнигорон даъват карда шуд, ки даст ба кор шаванд ва дар ҷамъоварии навиштаву барномаҳои журналистони маъруф саҳм гузоранд.