Соли 2022 дар кишвар аз ҷониби шаҳрвандон 770 ҳолати қонуншиканӣ вобаста ба вайрон намудани Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон” ба қайд гирифта шудааст, ки нисбати соли 2021, 89 адад зиёд аст.

Фаррухулло Олимзода, муовини раиси Кумитаи дин, танзими анъана ва ҷашну маросими назди Ҳукумати кишвар дар ин бора зимни нишасти хабарӣ хабар дод.

Ӯ гуфт, аз ин қонуншиканиҳо 475 ададаш дар тӯйҳои арусӣ ба қайд гирифта шудааст, ки беш аз 60%-ро ташкил медиҳад. Аз ин теъдод 10 парванда қатъ карда шуда, вобаста ба 760 ҳолати боқимонда қарори дахлдор бароварда шудааст. Маблағи умумии ҷаримаҳои таъингардида, 3 миллиону 450 ҳазору 372 сомониро ташкил медиҳад.

Ҳамзамон гуфта шуд, ки соли гузашта дар ҷараёни гузаронидани маъракаҳо 31 ҳазору 175 рейд, аз ҷумла, дар шаҳри Душанбе 5502, ВМКБ 335, вилояти Суғд 5639, вилояти Хатлон 9697, шаҳру ноҳияҳои тобеи ҷумҳурӣ 10002 рейд гузаронида шудааст.