Ба муносибати рӯзи таъсисёбии Қувваҳои Мусаллаҳи Ҷумҳурии Тоҷикистон ва ҷонибдорӣ намудан аз пешниҳоди Президенти Ассотсиатсияи футболи Осиёи Марказӣ (CAFA), президенти Федератсияи футболи Тоҷикистон муҳтарам Рустами Эмомалӣ ҷиҳати расман эълон намудани Рӯзи ҷаҳонии футбол ба Созмони Милали Муттаҳид чорабинии варзишии футбол доир гардид.

Чорабинӣ бо ибтикори шуъбаи кор бо ҷавонони Донишгоҳи давлатии Хуҷанд ба номи академик Бобоҷон Ғафуров дар маҷмааи варзишии “Хуррамшаҳр”и донишгоҳ доир гардида, дар маросими кушодашавии он масъулини донишгоҳ, Раёсати кор бо ҷавонон ва варзиши вилояти Суғд ва ҳайати устодону донишҷӯён ширкат варзиданд.

Нахуст Усмонзода Аюб Ислом, ректори донишгоҳ суханронӣ намуда, таъкид дошт: “Боиси ифтихору сарфарозист, ки дар кишвари азизу соҳибистиқлоламон соҳаи тарбияи ҷисмонӣ ва варзиш дар маркази таваҷҷуҳи бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Пешниҳоди Президенти Ассотсиатсияи футболи Осиёи Марказӣ (CAFA), президенти Федератсияи футболи Тоҷикистон муҳтарам Рустами Эмомалӣ ҷиҳати расман эълон намудани Рӯзи ҷаҳонии футбол ба Созмони Милали Муттаҳид амали саривақтӣ буда, барои эҳтиром ба солимии ҷомеаи ҷаҳонӣ ва рушди футбол басо муҳим мебошад”.

Иттилоъ дода шуд, ки мусобиқаи варзишии футбол байни устодон ва донишҷӯёни факултетҳои донишгоҳ то санаи 2-юми марти соли равон идома намуда, ғолибони мусобиқа дар охир бо Ҷом, диплом ва туҳфаҳои хотиравӣ қадрдонӣ карда мешаванд.