Русия дар соли сипаригардида 120 ҳазору 590 шаҳрванди Ҷумҳурии Тоҷикистонро авф намудааст.

Дар ин бора Ширин Амонзода вазири муҳоҷират, меҳнат ва шуғли аҳолии Ҷумҳурии Тоҷикистон зимни нишасти матбуотӣ иттилоъ дод.

“Аз ҷумла, дар доираи ҷаласаи 17-уми Комиссия оид ба ҳамкории иқтисодӣ байни Ҷумҳурии Тоҷикистон ва Русия, ҷалаи 25-уми Шӯрои роҳбарони мақомоти муҳоҷирати давлатҳои узви ИДМ, Форуми VII-уми Комиссия оид ба ҳамкории иқтисодӣ байни Ҷумҳурии Тоҷикистон ва Қазоқистон масоили муҳоҷирони меҳнатӣ баррасӣ гардида, протоколҳои дахлдор қабул гардид, ки дар натиҷа нисбат ба 120 ҳазору 590 шаҳрванди Тоҷикистон қонуни авф татбиқ гардид”,-гуфт вазир.

Ҳамзамон ӯ қайд намуд, ки дар соли 2021 373 ҳазору 773 нафар ба муҳоҷирати меҳнатӣ сафар намудаанд, ки 352 ҳазору 385 нафари онҳо ба Русия ва 9089 нафар ба Қазоқистон марбут аст. Инчунин 150 ҳазор нафар ба кишвар баргаштаанд.

Инчунин дар нишаст гуфта шуд, ки бо баргузории чорабиниҳои иттилоотӣ зиёда аз 150 ҳазор шаҳрванди тоҷик будубоши худро дар Русия расмӣ намудааст.