Ба воситаи парвозҳои чартерӣ 245 шаҳрванди Ҷумҳурии Тоҷикистон ба ватан ройгон интиқол ёфтаанд.  Дар ин бора Дилшод Исматуллозода, раиси ширкати "Тоҷик Эйр" 27-уми июл дар нишасти хабарӣ иттилоъ дод.

“Охири моҳи майи соли ҷорӣ тавассути ҳавопаймоҳои ин ширкат 245 шаҳрванди Тоҷикистон аз Русия ба кишвар ройгон интиқол ёфтанд. Бо дастури президент рӯзи 25 март 28 нафар шаҳрвандоне, ки дар минтақаи нигоҳдории фурудгоҳи Внуково дармонда буданд, ширкати “Тоҷик Эйр” ройгон ба Душанбе интиқол дод. Ҳамзамон 19 май 217 нафар шаҳрвандони Тоҷикистон, ки дар боздоштгоҳи муваққатии Сахарова буданд, ба кишвар интиқол дода шуданд. Маблағи ин мусофиронро Ҳукумати кишвар пардохт кард”,-гуфт Исматуллозода.

Масъулини Оҷонсии авиатсияи шаҳрвандӣ мегӯянд, ҳамаи шаҳрвандони овардашуда ба карантин фаро гирифта шуда, баъди муайян шудани натиҷаи ташхис рухсат дода шуданд.

Тоҷикистон аз нимаи дуюми моҳи март бо ҳадафи пешгирӣ аз сирояти коронавируси нав парвозҳои байналмилалиро қатъ кард. Баъдан Ҳукумати Тоҷикистон ба воситаи парвозҳои чартерӣ ва ғайринақшавӣ шаҳрвандонро ба ватан овард. То имрӯз аз Русияву Ҳиндустону Туркия, Имороти Муттаҳидаи Араб ва Олмону Амрико шаҳрвандон баргардонида шуданд. Бо парвозҳои чартерӣ тавассути ду ширкати ватанӣ то 1 июл чор ҳазор шаҳрвандон ба кишвар баргардонида шудаанд.