Сокини пойтахт будан барои ҳар шаҳрванд масъулияти ҷиддиро пеш мегузорад. Риоя накардани маданияти шаҳрнишинӣ, тоза нигоҳ доштани биноҳои истиқоматӣ ва муносибати ҷамъиятӣ бояд дар сатҳи зарурӣ риоя гардад. Вале дар рафти доир кардани санҷишҳои комиссияи муштараки ВКД бо дигар сохторҳои давлатӣ ошкор сохт, ки баъзе сокинони пойтахт дағалона қоидаҳои шаҳрнишиниро вайрон карда, ҳатто ба дуздии нерӯи барқ ва ифлоскунии муҳити зист даст мезадаанд. Аз ҷумла, дидаю дониста дағалона вайрон намудани қоидаҳои бехатарӣ аз сӯхтор ва санитарию эпидемологӣ аз ҷониби бархе сокинон дар биноҳои истиқоматии баландошёна, ки ҳар лаҳза метавонад боиси ба амал омадани сӯхтор ва  дигар ҳодисаҳои нохуш гардад, хеле нигаронкунанда аст. Чунин як ҳолати ташвишовар дар бинои истиқоматии 12-ошёнаи хиёбони А. Сино-134 аз ҷониби кормандони СХДО ВКД ва воҳидҳои он ошкор карда шуд. Истиқоматкунандаи ҳуҷраи №14-и бинои мазкур Замирахон Меликмуродоваи 45-сола бар хилофи қонуну қоидаҳои амалкунанда ва талаботи Маромномаи сокини пойтахт амал намуда, дар роҳрави ошёнаи чорум барои пӯхтани хӯрок оташдон гузошта аст. Чунин кирдори ношоям ба ҳаёту саломатӣ ва  молу мулки истиқоматкунандагони бино эҳтимоли расонидани зарар ва ба вуҷуд омадани ҳодисаю воқеаҳои нохушро дар пай дорад.

Ҳамин гуна ҳолати ногувори бехатарӣ аз сӯхтор ва санитарию эпидемологӣ дар маркази савдо ва дигар нуқтаҳои фурӯш, ки дар ошёнаи якуми ин бинои истиқоматӣ ҷойгиранд, ошкор карда шуд. Гарчанде дар маркази савдои бинои номбурда маҳз бо сабаби риоя нашудани талаботи қонуну қоидаҳои бехатарӣ аз сӯхтор ва дигар меъёрҳои зарурӣ қаблан сӯхтор рӯх додаву боиси хисороти калони молию моддӣ, инчунин ба вуҷуд овардани таҳлука ва ташвишҳои зиёд дар байни сокинони бино шуда буд, аммо соҳибкорон Шуҳрат ва Баҳодур Холназаровҳо дидаю дониста ба камбудиҳо роҳ додаанд. Чунин вайронкуниҳои қоидаҳои бехатарӣ аз сӯхтор дар нуқтаи фурӯши хӯроки  умумӣ, воқеъ дар маҳаллаи 46-ум низ аз ҷониби кормандони СХДО ВКД муайян карда шуд. Гарчанде чанд муддат пеш ин ҷо ҳам ҳодисаи сӯхтор бо хисороти калони молию моддӣ ба қайд гирифта шуда буд, вале соҳибкор Саид Орзуев боз қонуну қоидаҳои бехатарӣ аз сӯхторро сарфи назар намуда, дар як маврид истифодаи зиёди асбобҳои барқиро ба роҳ монда, сарбории зиёдро дар ноқилҳо ба вуҷуд овардааст, ки чунин ҳолат хавфи ба амал омадани сӯхторро дар пай дорад. Ҳамин гуна ҳолати ногувор ва риоя нашудани ҳолати санитарию эпидемиологӣ дар нуқтаи пирожкипазии соҳибкор Ҷамила Кенҷаеваи 42-сола, дар кӯчаи Фирдавсӣ ба қайд гирифта шуд, ки на танҳо сабаби сар задани сӯхтор, инчунин эҳтимоли ба вуҷуд овардани касалиҳои сироятиро дорад. Аз ҷониби гурӯҳи кории муштараки ноҳияи Сино ҳам далелҳои дуздии нерӯи барқ аз тарафи шаҳрвандон ошкор карда шуд. Аз ҷумла, чунин ҳолат аз ҷониби сокини маҳаллаи Буни Ҳисорак Назаралӣ Шарипов дар бинои истиқоматии навбунёдаш ошкор гардид. Ҳамин гуна далели дуздии барқ  ва риоя нашудани ҳолати санитарию эпидемиологӣ ва бехатарӣ аз сӯхтор боз дар манзили истиқоматии шаҳрванд Иноят Фатоеви 54-сола, воқеъ дар кӯчаи Мирзо Турсунзода-4 муайян карда шуд, ки соҳибхона бо ин кирдори худ ба буҷаи давлат ба маблағи 2750 сомонӣ зарар расонидааст. Илова бар ин номбурда бар хилофи талаботи қоидаҳои шаҳрвандӣ 5 кабкро, ки парандаи нодир ба ҳисоб меравад, дар дохили ҳуҷраи зисташ бо дағалона вайрон намудани ҳолатҳои санитарию эпидемологӣ нигоҳ медоштааст.

Бо мақсади бартараф кардани камбудиҳо ва сари вақт пешгирӣ намудани ҳар гуна ҳодисаву воқеаҳои нохуш нисбат ба ҳуқуқвайронкунандагон протоколҳои маъмурӣ тартиб дода, ҷарима татбиқ карда шуд. Инчунин бо онҳо дар мавзӯи риояи ҳатмии талаботи қонунгузории Ҷумҳурии Тоҷикистон ва ифтихор доштан аз сокини пойтахт будан, масъулияти бештари шаҳрнишиниро эҳсос намудан дастуру суҳбатҳо гузаронида шуд.
Шаҳрвандони муҳтарам!

Сокини пойтахт будан шараф аст. Душанбеи сарсабзу хуррам дорандаи Ҷоизаи шаҳри сулҳ аст ва ин мақоми беназир моро водор месозад, ки тавассути таъмини ҳамзистии фарҳангу таркиби иҷтимоии ҷомеа, бо риояи ҳатмии Маромномаи сокини пойтахт ва дигар талаботи қонуну қоида ва меъёрҳои зарурӣ, бахусус таъмин ва риояи қоидаҳои бехатарӣ аз сӯхтор, ҳолатҳои санитарию эпидемиологӣ, ҳифзи муҳити зисту ободонӣ, покизадории манзилҳои истиқоматию ҷойи корӣ ва ҷамъиятӣ масъул бошем.


Кароматулло АБДУЛОЕВ,
Толиб ҲАЁТОВ,
кормандони СХДО ВКД