Соли 2023 аз ҷониби Агентии назорати давлатии молиявӣ ва мубориза бо коррупсияи Ҷумҳурии Тоҷикистон 2212 ҷинояти коррупсионӣ ошкор гардидааст.

Дар ин бора имрӯз 16-уми феврал Сулаймон Султонзода, директори ин ниҳод зимни нишасти хабарӣ иттилоъ дод.

Бино ба иттилои Султонзода дар натиҷаи тафтишҳо нисбати 1192 нафар парвандаи ҷиноятӣ боз намудаанд, ки аз ин миқдор 911 адади он ба гурӯҳи ҷиноятҳои вазнин шомиланд.

- Дар натиҷаи ошкор намудани ҷиноятҳои коррупсионӣ аз ҷониби Агентӣ 265,9 млн. сомонӣ зарари молиявӣ ошкор гардида, 261 млн. сомонии он ба манфиати давлат барқарор карда шудааст, - гуфт номбурда.

Дар идома таъкид гардид, ки дар ин давра Агентӣ дар ҳамаи самтҳои фаъолият 345,4 млн. сомонӣ ба давлат барқарор намудааст, ки 251, 2 млн. сомонии он ба субъектҳои буҷетӣ ва 94,2 млн. сомонӣ ба фоидаи ташкилоту муассисаҳои давлатӣ мебошад.

Яҳё МАҲМАДНАБИЕВ, “ҶТ”