ҶОМЕА
Шанбе 20 Апрел 2024 03:06
7996
“Прокуратураи генералӣ вазифадор карда мешавад, ки лоиҳаи нави “Стратегияи миллии Ҷумҳурии Тоҷикистон оид ба муқовимат ба терроризм ва экстремизм барои солҳои 2021 – 2025”– ро таҳия ва ба баррасии Ҳукумат пешниҳод намояд”.

                                                                                                                                                        Эмомалӣ Раҳмон

Тоҷикистон дар миёни давлатҳои Осиёи Марказӣ кишварест, ки нахустин шуда, стратегияи муқовимат ба экстремизму терроризмро ба тавсиб расонидааст. Ҳанӯз соли 2016 бо фармони Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон “Стратегияи миллии Тоҷикистон оид ба муқовимат ба экстремизму терроризм барои солҳои 2016 - 2020” ва нақшаи иҷрои он ба имзо расида буд.

Бо гузашти давраи амалигардии стратегияи мазкур Роҳбари давлат зимни ироаи Паёми имсолаи худ бо назардошти шароити нави дунё ва таҳдиду хатарҳо, ба Прокуратураи генералии Тоҷикистон дастур дод, ки Стратегияи нави Ҷумҳурии Тоҷикистонро барои мубориза бо терроризм барои солҳои 2021 - 2022 таҳия ва ба Ҳукумат пешниҳод намояд.

Интизор меравад, ки дар Стратегияи нав барои боз ҳам пурзӯр намудани муқовимат бо терроризму экстремизм дар Ҷумҳурии Тоҷикистон тағйиру иловаҳо ворид карда мешавад. Он дар таҳрири нав чӣ гуна ва бо кадом навигариҳо қабул карда мешавад? Коршиносон оид ба ин зуҳурот фикру мулоҳизаҳои гуногун доранд.

Рустам Азизӣ, муовини раиси Маркази исломшиносии Тоҷикистон мегӯяд, стратегияи наве, ки бар зидди экстремизму терроризм равона гардидааст, дар таҳрири нав судмандтар ва ба манфиати ҷомеа хоҳад буд.
“Стратегияи қаблӣ бештар ба чораҳои зӯрию қудратӣ такя мекард, ҳоло матни нав ва умуман нақша – чорабиниҳои мубориза бар зидди ин зуҳурот дуруст шуда истодааст, ки дар он асосан кор бо ҷомеа, фаъолони ҷомеа ва бештар ба баланд бардоштани сатҳи огаҳӣ, устуворӣ ва ҳамкорӣ дар роҳи мубориза бо хатарҳои ифротишавӣ равона шудааст”, - гуфт, Р. Азизӣ.

Коршинос Шералӣ Ризоён барои қабули Стратегияи нав бар муқобили терроризм ва экстремизм пешниҳод менамояд, ки тавонмандии ҷомеаи шаҳрвандӣ, аз ҷумла воситаҳои ахбори омма дар раванди пешгирӣ аз экстремизм бояд тақвият дода шавад ва дар умум, таҳкими ҳамкориҳо миёни ниҳодҳои давлатӣ ва институтҳои ҷомеаи шаҳрвандӣ бояд идома ёбад.

“Таҳия ва татбиқи абзори нарму равишҳое муҳим аст, ки бештар ба тарҳрезии маҳсулоти зеҳние равона шуда бошанд, ки ба унвони гузинаи ҷаҳонбинии ифротгароёна дар пешгирӣ аз экстремизм ва терроризм истифода бурда шавад”, - мегӯяд, ӯ.

ҶАВОНОН ЗИРАКУ ҲУШЁР БОШАНД

Чӣ гунае, ки таҳлилҳо нишон медиҳанд, дар Ҷумҳурии Тоҷикистон ба гурӯҳҳои экстремистиву террористӣ бештар ҷавонон мепайванданд ва бо вуҷуди чораандешиҳои Ҳукумати кишвар масъалаи гаравиши ҷавонон ба ҳизбу ҳаракатҳои ифротӣ нигаронкунанда боқӣ мемонад. Аз ин рӯ, Президенти кишвар дар Паёми охирашон ба мардуми кишвар, бахусус ба ҷавонон таъкид намуданд, ки мебояд ҳамеша зираку ҳушёр бошанд, то ин ки ба доми ҳар гуна гурӯҳҳои ифротӣ наафтанд.

Чунин суханон аз ҷониби Президенти кишвар бори аввал набуда, ҳамасола дар ҳама паёмҳои хеш ин нуктаро зикр мекунанд.

“ФАЪОЛИЯТИ РАВИЯҲОИ ИФРОТӢ ХАТАРЗО АСТ”

Ҳамзамон Президенти кишвар дар Паёми имсолаи худ фаъолияти равияҳои ба мисли экстремистӣ, радикалӣ ва хурофотпарастиро яке аз омилҳои асосии хатарзо барои имрӯзу фардои Тоҷикистон ва дигар кишварҳои минтақа арзёбӣ карда, таъкид намуданд, ки бояд дар ин раванд чораҳои зарурӣ андешида шавад.
Рустам Азизӣ низ мегӯяд, ки дар раванди коҳиш ёфтани ин зуҳуроти номатлуб мақомоти кишвар саҳми арзандае дорад, вале наметавон гуфт, ки ин зуҳурот ба пуррагӣ аз байн рафтааст.

“Албатта он нақша - чорабиниҳое, ки дар Стратегияи миллӣ оид ба мубориза бар зидди экстиремизм дарҷ шудаанд, таъсири худро доранд ва то андозае сабаби баланд шудани огоҳии ҷомеа нисбати ин зуҳурот гардид. Вале то ҳол баъзе камбудиҳо дар ин самт вуҷуд доранд”, - гуфт, номбурда.

Ба ақидаи ӯ, коҳиши гаравиши ҷавонон ба гурӯҳҳои ифротию террористӣ аз коҳиши талабот ба гурӯҳҳои террористӣ низ вобаста аст.

“Бояд бигӯем, ки миқдори ҷавонони ба гурӯҳҳои ифротӣ пайваста кам шуда истодааст, аммо ин шохиса нест. Чунки дар воқеъ талабот ба ҷанговарон ва размандагон коҳиш ёфт. Вақте ки талабот нест, албатта сафар ба минтақаҳои ҷангзада низ кам мешавад”, - мегӯяд коршинос.

Ӯ таъкид мекунад, ки албатта корҳои фаҳмондадиҳӣ таъсир доранд, вале ҳалли он ба таври эҳсосшаванда нест.

“Аз ҳама муҳим он аст, ки ҳоло касе табли шодӣ назанад. Чунки агар барои талабот ба размандагону ҷанговарон дар гурӯҳҳои ифротӣ зарурат пайдо шавад, ёфтани миқдори зарурии гаравандагон ба гурӯҳҳои гуногуни ифротӣ, хусусан аз дохили муҳоҷирони тоҷик, он қадар душвор нест”,- илова кард коршинос.

ҲАМКОРИҲОИ СУДМАНД БО ДИГАР КИШВАРҲО

Президенти кишвар дар идомаи Паёмашон таъкид доштанд, ки дар ин раванд Ҷумҳурии Тоҷикистон бо кишварҳои ҳамсоя низ ҳамкориҳои судмандро ба роҳ мондааст ва мақомотҳои судмандро вазифадор намуданд, ки ҳамкориро дар ин самт тақвият бахшанд.

“Мо борҳо эълон намудаем, ки Тоҷикистон дар арсаи мубориза бар зидди терроризму экстремизм, қочоқи силоҳ, маводи мухаддир, киберҷинояткорӣ ва дигар ҷиноятҳои муташаккили фаромиллӣ шарики табиии давлатҳо ва созмонҳои байналмилаливу минтақавӣ мебошад.

Аз ин рӯ, Прокуратураи генералӣ, вазорати корҳои дохилӣ ва Кумитаи давлатии амнияти миллиро зарур аст, ки ҳамкориро бо сохторҳои марбутаи давлатҳои хориҷӣ ва минтақавию байналмилалӣ дар ин самт тақвият бахшанд”- илова намуданд, Сарвари давлат.

Ба гуфтаи Пешвои миллат то ҳол бархе аз бадхоҳон аз хориҷи кишвар бо тамоми роҳу воситаҳо кӯшиш мекунанд, ки ҷомеаи моро ноором созанд ва фарҳангу мазҳаби бегонаро ба сари мардуми мо таҳмил кунанд. Барои ҳамин ҳам Прокуратураи генералиро вазифадор намуданд, ки лоиҳаи нави “Стратегияи миллии Ҷумҳурии Тоҷикистон оид ба муқовимат ба терроризм ва экстремизм барои солҳои 2021 – 2025” - ро таҳия ва ба баррасии Ҳукумат пешниҳод намояд.

Стратегияи нав дар худ чӣ навгониҳоро пешбинӣ мекунад? Ё ин ки мубориза бо терроризму экстремизм бояд дар худ чӣ тағйироу иловаҳоро дошта бошад, то ин ки бо шеваҳои нав пеши роҳи гаравиш ба ҳизбу ҳаракатҳои гуногун гирифта шавад? Ин ҳама пас аз пешниҳоди он аз ҷониби Прокуратураи генералии кишвар маълум хоҳад шуд.


Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

Апрел 2024 c.