Шоҳроҳ байни пойтахти кишвар ва маркази Вахшонзамин ва вилояти Хатлон, шаҳри Бохтар то соли 2023 аз роҳи одӣ ба роҳи тезҳаракат табдил хоҳад ёфт. Ин роҳ, ки тӯли он 82 километрро ташкил медиҳад, айни замон 12 метр паҳно дорад. Баъдан 16 то 27 метр васеъ карда мешавад. 

Сармоягузори асосии таҷдиди роҳ Бонки осиёии рушд маҳсуб меёбад. Айни замон марҳилаи аввали таҷдиди роҳ идома дорад.

Барои бунёди марҳилаи аввал, ки тирамоҳи соли пешин оғоз ёфт, дар маҷмӯъ 96 миллион доллар маблағ ҷудо шуда, қисме аз он қарз ва қисми дигар чун ёрист. Маблағҳоро Бонки осиёии рушд, хазинаи ОПЕК ва Ҳукумати кишвар ҷудо кардааанд. Марҳилаи авввал аз пойтахт то деҳаи Даҳанакиики ноҳияи Хуросон тӯл мекашад. Пудратчии асосии он ширкати чинии “Синзян бейсин», мушовири байналмилалӣ ширкати олмонии “КОКС” маҳсуб меёбанд.

Барои таҷдиди марҳилаи дуюми роҳ, ки аз мавзеи Чашмасорони ноҳияи Хуросон то шаҳри Бохтар  тӯл мекашад, Бонки осиёии рушд 90 миллион доллар маблағи бебозгашт ҷудо мекунад.