Дар арафаи ба истифода додани аввалин агрегати НБО “Роғун” Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон ба ба 22 000 нафар коргарони НБО “Роғун” туҳфаҳои хотиравӣ тақдим намуданд.

Туҳфаҳоро аз номи Сарвари давлат Сарвазири Ҷумҳурии Тоҷикистон Қоҳир Расулзода ва Ёрдамчии Президенти Ҷумҳурии Тоҷикистон оид ба масъалаи кадрҳо Асадулло Раҳмон ба коргарон супориданд.
Заҳматҳои шабонарӯзии Пешвои миллат ва неруи бузурги муттаҳиди коргарону мутахассисони тоҷик самараи нек ба бор овард ва инак дар муҳлатҳои муайяншуда агрегати аввали Неругоҳи барқи обии “Роғун” ба фаъолият оғоз мекунад.

Ба иттиллои АМИТ “Ховар” зимни супоридани туҳфаҳои хотиравӣ Сарвазири мамлакат таъкид доштанд, ки Пешвои миллат муҳтарам Эмомалӣ Раҳмон меҳнати софдилонаю содиқона ва созандаи коргарон, намояндагони ширкатҳои сохтмониро дар ҷабҳаи нангу номус ҳамаҷониба қадр мекунанд.

Инчунин зимни маросими супоридани туҳфаҳои хотиравӣ — соатҳои рамзӣ ба коргарон дар минтақаҳои гуногуни маҳалли сохтмони Неругоҳи барқи обии “Роғун” низ сурат гирифта, мушовирони Президенти Ҷумҳурии Тоҷикистон онро бевосита ба ҳар як нафар тақдим карданд.