29 январ бо иштироки раиси шаҳри Бӯстон Рухсора Давлатзода дар Боғи фарҳангу фароғати ба номи Садриддин Айнӣ ба истиқболи иди Сада чорабании бошукуҳ баргузор гардид.

Рухсора Давлатзода ҳозиринро бо фарорасии иди Сада таҳният гуфта, зикр намуд, ки вобаста ба ҷанбаҳои тарбиявию ахлоқӣ ва шоистаи иди Сада Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон чанд сол муқаддам ҳангоми нахустин бор ҷашн гирифтани иди Меҳргон ишора карданд, ки: «… барои халқи тоҷик ҷашни Сада мисли ҷашни Меҳргон таърихи қадим дорад ва бояд аз нав эҳё гардад».

Раиси шаҳри Бӯстон оид ба суннатҳои хоси яке аз ҷашнҳои қадима ва мавсимии халқиятҳои ориёинажод – яъне иди Сада ибрози назар намуда, қайд кард, ки ин ҷашнро барои он Сада меноманд, ки аслан аз шумораи сад гирифта шуда, аз 10-уми моҳи Баҳман то омадани Наврӯз 50 шабу 50 рӯзро фаро мегирад.

Ҳамчунин дар ин рӯз баҳри фароғати шаҳрвандон барномаи рангини фарҳангӣ пешкаш ва дастурхони идона густурда шуд. Инчунин дар ин рӯз ярмарка-фурӯши ниҳол ва гулҳои ороишӣ ташкил карда шуда, бо иштироки роҳбарияти шаҳр дар мавзеъҳои гуногун дарахтони ҳамешасабз шинонида шуд.