Дар боғи фарҳанги-фароғатии ба номи Раҳмон Мӯрчаеви шаҳри Қӯрғонтеппа бо ташаббуси мақомоти иҷроияи маҳаллии ҳокимияти давлатии шаҳри Қӯрғонтеппа ва Ҳизби Халқии Демократии Тоҷикистон дар вилояти Хатлон бахшида ба Рӯзи маъюбон чорабинӣ доир гардид.

Дар чорабинӣ Асадулло Зикрихудоев, раиси иттиҳоди миллии “Маъюбони Тољикистон”, Аҳмадҷон Ализода, раиси КИ ҲХДТ дар вилояти Хатлон, Асадулло Шоев, мудири шуъбаи иқдисоди шаҳр ва Абдусамад Бобоҷонов, раиси маъюбони шаҳри Қӯрғонтеппа иштирок ва суханронӣ намуданд.

Асадулло Зикрихудоев таъкид намуд, ки имрӯзҳо, бо ташаббуси Сарвари давлатамон баҳри беҳтар намудани вазъи зисту зиндагонии шахсони дорои имконияташон маҳдуд, фароҳам овардани шароитҳои мусоиди солимгардонӣ, омодагии касбӣ, фароғативу истироҳатии маъюбон ва дастгирии моддиву маънавии онҳо пайваста тадбирҳои судманд роҳандозӣ гардида истодааст.

Аҳмадҷон Ализода дар тақвияти ин андеша иброз намуд, ки ҳар яки мо, ки меросбари кори падарон мебошем, бояд маъюбонро дастгирӣ намоем, ҳурмату эҳтироми пиронро ба ҷо оварда, онҳоро бо ғамхорию дастгирии ҳаматарафа фаро гирем. Бигзор пирони барнодил ва маъюбон ба бахти мо ҳамеша солиму бардам, дуогӯву маслиҳатгар ва раҳнамо бошанд.

Дар фарҷоми чорабинӣ аз тарафи МИҲД-и шаҳри Қӯрғонтеппа ва Кумитаи иҷроияи ҲХДТ дар вилояти Хатлон ба 50 нафар маъюбон туфаҳои хотиравӣ, ба як нафар аробачаи маъюбӣ ва ба се нафар асобағал супорида шуд.

Умед Мирзоев, “ҶТ”