Шоми 25-уми сентябр дар Маҷмааи таърихӣ-фарҳангии “Истиқлол”-и шаҳри Хуҷанд Рӯзи шаҳри Хуҷанд таҷлил шуд. Дар чорабинӣ меҳмонони хориҷӣ, ҳунармандон, шоирон, нависандагон ва сокинони шаҳр иштирок намуданд.

Дар толорҳои намоишии Маҷмааи таърихӣ-фарҳангии “Истиқлол”  ҳозирин намоиши маҳсулоти корхонаҳои шаҳри Хуҷандро тамошо намуданд. Ҳунармандони шаҳри Хуҷанд ба меҳмонон матои атсалу адрас, ҳунарҳои қадимаи тоҷикон, аз қабили кандакорӣ, гулкорӣ, зардӯзӣ ва кашидадӯзиро намоиш доданд. Шариф Шарифзода, раиси шаҳри Хуҷанд ҳозиринро ба муносибати 25-умин солгарди Истиқлолияти давлатӣ ва Рӯзи шаҳри Хуҷанд таҳният гуфта, иброз дошт:
 
- Хуҷанд макони илму маърифат, шаҳри қадимаи тоҷикон буда, даҳҳо шахсони барӯмандро ба воя расонидааст, ки имрӯз барои пешрафти соҳаҳои гуногун дар мамлакат саҳм мегузоранд. Дар давраи соҳибистиқлолии кишвар дар шаҳр биноҳои боҳашамати замонавӣ бунёд гардида, боғҳои фарҳангӣ-фароғатӣ сохта шуданд. Ҳусни шаҳрро мавзеъҳои нави фарҳангӣ зебо гардонидаанд. Дар арафаи ҷашни 25-солагии Истиқлолияти кишвар дар шаҳри Хуҷанд иншооти нодир - Маҷмааи таърихӣ-фарҳангии “Истиқлол”, Кохи ақди никоҳ, Кохи фарҳангии “Суғдиён” ва ғайраҳо ба истифода дода шуданд. Дар давраи соҳибистиқлолӣ дар шаҳр муассисаҳои таълимӣ таъмир гадида, мактабҳои нави замонавӣ қомат афрохтанд.



Бо қарори раиси шаҳри Хуҷанд Ш. Шарифзода шахсони барӯманд Абдувалӣ Комилзода, Муҳаббат Раҳманова, Хосият Зокирова ва Маъруф Бобоҷон барои хизматҳои шоиста дар соҳоҳаҳои гунонгуни хоҷагии халқ бо унвони шаҳрванди фахрии шаҳри Хуҷанд қадрдонӣ гардиданд.

Барои хизматҳои шоиста дар соли 2016 ва пешбурди фаъолияти касбӣ, ташаббускорӣ ва мусоидат дар ҳаёти ҷомеа Сайдулло Тагиров, Мавзуна Ваҳобова, Маҳмадҷон Сулаймонов, Мақсудӣ Анвар Темурзода, Ҷӯразода Ҷамшед Ҳабибулло, Илҳомҷон Комилов бо "Сипоснома"-и раиси шаҳри Ҳуҷанд қадрдонӣ гадиданд.

Ҳамчунин дар чорабинӣ ба бонувони ҳунарманд грантҳои раиси шаҳри Хуҷанд бо маблағи 5 ҳазор сомонӣ тақдим карда шуд.

Баҳри болидарӯҳии ҳозирин барномаи фарҳангӣ пешниҳод гардид.