Дар шаҳри Бохтари вилояти Хатлон бахшида ба иди касбии кормандони тиб чорабинии идона баргузор гардид.

Дар ин бора Раёсати кор бо ҷавонон ва арзиши вилояти Хатлон иттилоъ дод.

Ба гуфтаи манбаъ, чорабинии мазкур бо иштироки Абдулмаҷид Муминзод, раиси шаҳри Бохтар, кормадони Мақомоти иҷроияи ҳокимияти давлатии шаҳр, табибон ва сокинони касбу кори гуногун баргузор гардид.

Абдулмаҷид Муминзод зимни сухнронии хеш изҳор дошт, ки мояи сарфарозию ифтихормандист, ки тандурустӣ ҳамчун соҳаи афзалиятнок дар меҳвари сиёсати иҷтимоии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, баҳри ҳифзи сиҳатии омма ва рушди соҳа тадбирҳои ҳадафманд амалӣ гардида истодаанд.

- Бо шукӯҳу шаҳомат таҷлил намудани Рӯзи касбии табибон бори дигар қадршиносӣ ва арҷгузории давлат ва мардум ба заҳматҳои шабонарӯзии шумо мебошад, - илова намуд раиси шаҳри Бохтар.

Ҳамзамон, чорабинии мазкур Неъматулло Иброҳимзода, раиси Кумитаи иҷроияи ҲХДТ дар шаҳри Бохтар дизҳор дошт, ки табибон нафаронеанд, ки инсоният ҳамеша ба онҳо ниёз дорад.

- Аз ин ҷост, ки шаҳрвандон ба табибон ҳамчун наҷотбахшандагони ҷони хеш бо ихлос ва боварии том ва умедворона муроҷиат менамоянд. Дар воқеъ, касби табибӣ яке аз пешаҳои муҳимтарин ба шумор меравад, ки дар таърихи башарият мақом ва мартабаи хос дорад,-илова намуд номбурда.

Инчунин дар ҷамъомади мазкур кормандони хизматнишондода, арзанда ва фаъолони соҳаи тибби шаҳри Бохтар аз ҷониби раиси шаҳри Бохтар бо ифтихорнома, мукофотҳои мақомоти иҷроияи маҳаллии ҳокимияти давлатии шаҳри Бохтар ва туҳфаҳои хотиравӣ Кумитаи иҷроияи ҲХДТ дар шаҳри Бохтар қадрдонӣ шуданд.