Бо иштироки намояндагони мақомоти иҷроияи маҳаллии ҳокимияти давлатии ВМКБ, Раёсати кор бо ҷавонон ва варзиш, собиқадорони меҳнат, олимон ва омӯзгорони Донишгоҳи давлатии Хоруғ ба номи Моёншо Назаршоев, Пажӯҳишгоҳи биологии Помир ба номи Худоёр Юсуфбеков, Институти илмҳои гуманитарии Академияи илмҳои Ҷумҳурии Тоҷикистон ба номи Баҳодур Искандаров таҳти унвони “Истиқлолият бузургтарин дастоварди миллат аст” дар шаҳри Хоруғ конфронси илмӣ–амалӣ баргузор гардид.

Гулдаста Орумбекова, муовини раиси ВМКБ конфронсро ифтитоҳ намуда изҳор дошт, ки дастовардҳои 26–соли Истиқлолияти давлатӣ зиёданд, аммо танҳо шаҳрвандони боору нанг, соҳибмаърифат ва рӯзгордида ба қадру манзалати онҳо мерасанд: “Кишвари азизи мо аз тарафи ҷомеаи ҷаҳонӣ ҳамчун мамлакати соҳибихтиёру демократӣ ва ҳуқуқбунёд эътироф шудааст. Феълан мардуми фарҳангдӯсти он ба хубӣ дарк намуданд, ки танҳо дар муҳити суботу оромии бардавом метавон арзишҳои Истиқлолиятро таҳким бахшид”.
Юсуфбек Шодмонбеков, муаллими калони кафедраи таърихи халқи тоҷик зимни маърӯзааш дар мавзӯи “Рисолати таърихӣ ва таҳкими Истиқлолияти давлатӣ” иброз дошт, ки дар ҳамаи давру замонҳо ҳар миллат хостори озодиву соҳибихтиёрии давлат аст ва миллати бузурги мо низ аз он истисно нест: “Табиист, ки истиқлолиятхоҳӣ таърихан ба мардуми тоҷик хос буда, озодандешӣ ҷавҳари азалии ин халқият маҳсуб меёбад. Баҳри расидан ба ин ҳадаф аҷдодони мо корнамоиҳои бемислу монанд карда, тариқи фарҳанги волои хеш тавонистанд худро ҳамчун миллати мустақил нигоҳ доранд.”

Ғолиб Ниятбеков, асистенти кафедраи фалсафа ва сиёсатшиносӣ иброз намуд, ки воқеаи мудҳиштарин дар таърихи кишвар ин ҷанги шаҳрвандӣ буд ва қувваҳои зиёде дар он даст доштанд. “Ҳанӯз солҳои 90–уми асри гузашта бархе аз давлатҳои исломиву абарқудрат ва хоинони миллат ният доштанд, ки Тоҷикистонро ба як майдони ҷанг табдил диҳанду ба ҳадафҳои нопоки хеш расанд. Аммо мардуми шарафманди тоҷик таҳти сарварии Президенти кишвар, муҳтарам Эмомалӣ Раҳмон тавонистанд ба ин найрангу дасисабозиҳо нуқта гузоранд ва Истиқлолияту Ваҳдати комилро ҳифз намоянд, - афзуд ӯ.

Қувватбек Одилбеков, муовини директори Пажӯҳишгоҳи биологии Помир ба номи Х. Юсуфбеков, Насим Саидраҳмонов, ассистенти кафедраи таърихи халқи тоҷик дар мавзӯҳои “Рушди Пажӯҳишгоҳи биологии Помир дар 26-соли Истиқлолият”, “Истиқлолият – беҳтарин дастовард” маърӯза карданд.

Ҳамчунин, Сардорбек Азорабеков, мудири Шуъбаи оид ба корҳои дин, танзими анъана ва ҷашну маросимҳои миллии вилоят перомуни тағйиру иловаҳо ба Қонуни Ҷумҳурии Тоҷикистон “Дар бораи танзиму анъана ва ҷашну маросимҳо дар Ҷумҳурии Тоҷикистон” ба ҳозирин маълумоти муфассал пешниҳод намуд.

Машҳур ИМОМНАЗАРОВ, “ҶТ”