ҶОМЕА
Душанбе 14 Октябр 2019 06:23
2498
Таълиму тарбияи насли наврас кори пурифтихор ва шараф аст. Зеро дар натиҷаи тарбияи дуруст насли аз ҷиҳати ахлоқӣ ва ҷисмонӣ солим барои ҷомеа пайдо ва хизмат менамояд. Ҳамин аст, ки ин пешаи пурифтихор бе меҳнату заҳмат намешавад. Шабу рӯз заҳмат мебояд кашид, то насли наврас насли воқеии намунавӣ гардад.  

Боиси нигаронӣ аст, ки дар ҷомеаи имрӯзаи мо наврасон ба амалҳои номатлуб, ҳатто ҷиноят даст мезананд. Ин зуҳурот ҳоло шакл гирифта истодааст, ки талаб мекунад, на танҳо аҳли илму маориф ва оила, балки тамоми институтҳои ҷамъият барои дурусту хушахлоқ ва ба ҷомеаву миллат фоидаовар ба камол расидани насли наврас диққати ҷиддӣ диҳанд. Чунки дар шароити ҳозира оилаву мактаб танҳо наметавонанд аз уҳдаи идораи наврасон бароянд. Барои он ки дар ҷомеа унсурҳои ҷалбкунанда ва ба ҳар роҳи дигари номатлуб рафтани наврасону ноболиғон мавҷуд аст.

Албатта, баъд аз марҳилаи наврасӣ дар ҳаёти шахс зинаи баъдии он шуруъ мешавад, ки даврони ҷавонист. Агар наврасон даврони наврасиашонро бо ҳазору як мушкили равониву ахлоқӣ гузарондида бошанд, табиист, ки ҷавониашон ҳам ҳамсон мегузарад ва аз онҳо умедвор шудан нашояд.

Ҳамаи мо медонем, ки Ҳукумати мамлакатамон барои насли наврас ва ҷавонон ғамхориҳои зиёде мекунад. Худи “Соли ҷавонон” эълон гаштани соли ҷорӣ далели ин гуфта аст. Инчунин дар мулоқоти Пешвои миллат бо фаъолон ва масъулони шаҳри Душанбе дар таърихи 15 феврали соли ҷорӣ бори дигар ба масъалаи наврасон, назорат ва тарбияи дурусти онҳо таваҷҷуҳ карда шуд. Махсусан, қайд гардид, ки “Воридшавии хонандагони мактабҳои таҳсилоти умумӣ ва умуман наврасони то синни 14 баъд аз соати 18 ба интернет-кафеҳо манъ карда шавад”. Фикр мекунам, ин супориши Президенти муҳтарам, Пешвои миллат Эмомалӣ Раҳмон айни муддаост. Зеро аксари наврасон хушунату зӯроварӣ ва дағалиро аз тариқи интернет ёд мегиранд. Онҳо дағалиро дар бозиҳои интернетӣ, ки аксарияти зиёдашон ба руҳу равон ва мафкураи наврасон таъсири сахти манфӣ доранд дида, дар ҳаёти худашон ҳам амалӣ кардан мехоҳанд. Ҳол он ки бозӣ, хусусан бозиҳои компютерӣ, дигар асту зиндагии воқеии мо дигар. Бинобар ин, дар баробари назорати мақомоти дахлдошта дар берун инчунин зарур аст, ки волидон дар хона ва муаллиму мураббияҳо дар мактабҳо назоратро пурзӯр намоянд. Бояд ҳамон ҳалқаи оила - мактаб – ҷомеа ба таври ногусастанӣ сохта шавад ва амал намояд. Танҳо дар ин ҳолат насли наврасро аз ҳар гуна оқибатҳои харобиовар ҳимоя кардан мумкин мегардад.


Нигина БУЗУРУКОВА,
директори МТМУ №94-и шаҳри Душанбе

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Октябр 2019 c.