Ширкати ватании ҳавопаймоии Тоҷикистон «Тоҷик-Эйр» аз 25 феврал ба иҷрои хатсайри Душанбе – Хоруғ – Душанбе шуруъ менамояд.

Дар ин бора котиби матбуоти ширкати «Тоҷик Эйр» Азиз Хайруллоев иттилоъ дода, зикр кард, ки сабаби асосии муваққатан манъ намудани парвозҳои доимӣ дар хатсайри Душанбе – Хоруғ гузаронидани корҳои хизматрасониҳои техникӣ  дар ҳавопаймои “АН – 28” мебошад.

«Айни ҳол талаботи ҷомеаро ба инобат гирифта, мо омода ҳастем, ки парвозҳоро дар ин самт ба таври мунтаззам бо истифодаи чархболи “МИ–8” ба роҳ монем. Ин чархбол дар шароити мувофиқати боду ҳаво ҷиҳати парвоз ба ҳама гуна самтҳо муддати 24 соат дар як шабонарӯз омода аст. Бо чархболи “МИ-8” метавон 22 нафар мусофирро ба нуқтаи таъинот расонид, ки шуморашон аз ҳавопаймои “АН-28” зиёдтар мебошад», - изҳор намуд Азиз Хайруллоев.

Тибқи нақша парвози нахустин 25-уми феврал соати 8:00 анҷом дода мешавад. Арзиши чипта – 615 сомонӣ.